Mga Indi Pag-intindihanay sa Border

 

Siyudad sang Roxas—Apisar nga nagalain ang buot sang natabo nga indi pag-intindihanay kahapon sa tunga sang mga barangay offcial sang Brgy. Adlawan kag Lonoy kag Provincial Director Julio Gustilo sang Capiz Police Provincial Office, apang sa gihapon padayon sila nga magabantay sa mga dulunan sang nahinambitan nga barangay.

Kon aton nabati-an kahapon sa mga istasyon sang radyo nga ginaalegar nga may indi pag-intindihanay sa tunga sang mga barangay official, traffic auxillary kag ni Gustilo.

Suno sa interview sa FB Page sang isa ka radio station kay Brgy. Captain Roberto Roldan nga tani dapat kuno nga mahinahon si Gustilo kag magpamangkot kon ano ang nagakatabo kag kon mahimo kuno ni Gustilo sa iya mga pulis pero sa ila indi dapat himuon.

Sa pareho man nga interview, gintuad sang traffic auxillary nga duty didto sa border sang adlawan nga takna alas 4:00 sang hapon sang March 26, 2020, nag-abot didto si Gustilo sakay sang salakyan kag nagpamangkot sa ila kon diin ang mga pulis.

Tapos niya pamangkot ginturo-turo siya kuno dayon kag ginhambalan nga salot sila sa karsada kag dapat sa higad lang kuno sila kag mangdakop sang wala helmet.

Ginhambalan pa gid siya kuno ni Gustilo nga pasudlon lang ang truck bisan wala sang health certificate kag bisan wala karga.
Ginhambal pagid kuno siya nga bisan isugid pa sa ila mayor. Suno sa traffic auxillary nga ang ginhalinan sang kaingit ni Col. Gustilo amo ang indi pagpasulod sang truck sa border nga halin sa Estancia.

Insigida ginsabat naman ini ni PD Gustilo ang mga alegasyon sa iya sang gin-interview ini sang mga katapo sang local media.

Suno kay Gustilo nga nagasunod gid lang man siya sang mando sang Executive Order No. 12 nga ginpagwa ni Governor Esteban Contreras sadtong March 25, 2020.

Suno sa iya nga nakabutang sa Article III, Section 12 sang nahinambitan nga EO nga nagasiling: “Unrestricted Movement of Cargoes. All cargoes (food and non-food) coming in and out of the Province of Capiz, shall not be delayed or hampered by reason of the quarantine, either general or enhanced, subject to protocols as to personnel involved.”

Suno pa kay Gustilo nga wala sang awtoridad ang mga barangay official kag traffic auxillary sa border nga mag-check sa mga nagagwa kag gasulod kundi ang mga katapo lang sang Inter-Agency Task Force (IATF). Sila amo ang mga miyembro sang Philippine National Police, Armed Forces of the Philippines, Bureau of Fire Protection kag Philippine Coast Guard.

Suno pa kay Gustilo nga gusto lang niya nga indi maabala ang mga importante nga kinhanglanon diri sa atong nga siyudad ilabi na gid ang pagkaon.

Didto naman sa border sang Lonoy, hambal ni Gustilo nga nakita niya didto ang isa ka jeep nga may karga nga mga 30 ka sako nga saging.

Suno kuno sa driver, gin-arkilahan siya sang tag-iya sang saging sang P2,000. Tungod indi siya pagpasudlon, ginbilin niya ang saging sa border kag nagbalik siya sa Tapaz, Capiz. Ang gin-obra naman kuno sang tag-iya sang saging—nag-arkila otro sang tricycle kag nagbayad naman liwat sang P600 agud idul-ong ang saging sa merkado.

Sa Executive Order No. 14, Series of 2020 nga ginpagwa naman ni Mayor Ronnie Dadivas satong March 19, 2020, nahanungod sa Border Restriction Sec. 1, Par. e) nagasiling: “All traders of essential goods may be allowed to enter the City provided they will present valid IDs, health clearance necessary permits pertaining to their line of business.”

Dugang pa dira: “All traders of non-essential goods may be allowed to enter subject to the urgency of request of the consignee, shipper and the like, subject to the approval of the City Mayor, or City Administrator upon submission of Border Security Control (BSC) Form 01”.