Monoblock chairs halin kay Vice Gov. James Magbanua

Siyudad sang Roxas—Bilang bulig sa mga kabarangayan kag paagi sa iya mga panikasog, nagpanagtag sang mga monoblock chairs si Vice Gov. James Magbanua sang nagligad.

Kapin sa 20 ka mga monoblock chair ang nabaton sang mga nagkalain-lain nga mga barangay sa mga kabanwahanan diri sa probinsya.

Sa banwa sang Cuartero nakabaton ang mga barangay sang Poblacion Takas, Poblacion Ilaya, Nagba, Agcabugao, Bun-od, Malagab-i, kag Bitoon Ilawod.

Nakabaton man ang pulo ka mga barangay sa banwa sang Dao. Ini ang Daplas, Agtangway, Malonoy, Ilas Sur, Ilas Norte, Centro, Balucuan, Poblacion Ilawod, Duyoc kag Lacaron.

Una na nga nakabaton sang mga monoblock chairs ang iban pa nga barangay sang Ilaya, Nasunogan, Quinabcaban, Manhoy, Bita, Aganan, Agtambi kag Matagnop sang banwa sang Dao.

Amo man nga nakabaton ang Dapdapan, Sapian, Burias kag Balat-an sa Mambusao; kag  ang Malonoy, Aglanot Senior Citizens kag Dacuton Elementary School sang Dumarao.

Nagbisita man si Vice Gov. Magbanua kaupod nanday Board Member Thea Faith Reyes kag Weldie Apolinario Jr. sa Barangay Dulangan sa paghatag sang monoblock chairs kag Philippine flag kag pagpatigayon sang barangay database.

Nagpanagtag man sila sang mga payong sa mga barangay health worker sang Barangay Olalo sa banwa sang Pilar. Dugang man sini ang paghatag sang mga school supplies, hygiene kits kag Philippine flag kag pagkay-o sang database sang nasambit nga barangay.

Dako naman ang pagpasalamat sang mga barangay official nga nangin benepisyaryo sang nasambit nga proyekto.

Ginakalipay man sang opisyal sang barangay ang ini nga proyekto bangud dako ang mabulig sini sa ila mga kinahanglanon labi na gid sa mga pumuluyo nga may magamit sa tion nga magapadulong sa barangay.

Samtang ginakalipay man sang school head sang Jamul-awon Eementary School nga si Marites Dolor ang gin-donate nga printer ni Vice Governor Magbanua. Suno kay Dolor, dako gid ang mabulig sini labi na gid subong nga mas kinahanglan ini sa paghimo sang mga modules sang mga kabataan bilang paghanda sa blended learning program sang Department of Education.

Una na nga nagpabutyag ang bise gobernador sang iya adbokasiya tuhoy sa pag tib-ong kag pagsuporta nga mangin madinalag-on ang pagpatuman sang blended learning program.

Isa man sa mga agenda ni Vice Governor Magbanua ang pagsuporta sa edukasyon bilang personal nga adbokasiya. (Office of the Vice Governor)