Nabatyagan Nyo Bala ang Nabatyagan Ko?

Siyudad sang Roxas—Sa karon nga panahon, indi na ko kaintindi sang ginbatyag ko. Kon magwa kita sa aton panimalay, ano ayhan ang nagahulat sa aton sa gwa? Samtang nagalakat kita, ano ayhan ang aton masugata? Covid bala? Kalamidad? Disgrasya?

Umpisa Agosto 15, 2020, sang gin-implementar nga mandatory ang pagsuksok sang face shield, nadugangan pa gid kapiot ang akon nabatyagan tungod may facemask ka na, masuksok ka pa sang face shield.

Daw sa indi ka kaginhawa, kag mainit pa. Daw ginapo-ot ka, kag ginahapo pa. Daw pamatyagan ko indi ko mapatay sa virus, pero sa face shield kag facemask daw mapatay ko, kag.

Apang kon aton panumdumon ayhan, indi bala kita masudlan sang virus kon naga-faceshield kita? Kay suno sa mga eksperto, ang virus halin sa laway sang tawo nga nagatagsik kon nagaistorya kamo.

Muna gani nga ginapadistansya kita isa ka metro agud indi kita matagsikan. Kag ang tanan nga matagsikan sina nga laway nagatiner dira ang virus sa sulod sang 6 tubtob 8 ka oras.

Kag delikado kon aton ini mahawiran kay magtapik ini sa aton kamot kag kon ang aton kamot ikamlot naton sa aton ilong, baba, guya, kag mata, magasulod ang virus sa aton lawas.

Hay! Ngaa man kinahanglan gid naton mag suksok sang face shield nga ini? Ano ang benepisyo sini sa aton? Kay mata man lang naton ang ginatabunan; kay ang aton baba kag ilong sarado man sang facemask gani. Abri man ang aton dulungan. Kampeon gid ya ang nag suggest sini nga i-mandatory sa mga Pilipino.

Pareho man sinang barrier sa may mga nagaangkas nga motorsiklo, mandatory man. Kon mag asawa kuno kamo kinhanglan nga magpakita gid sang mga dokumento nga mag-asawa kamo.

Kay kon live-in partner lang, dapat may barrier gid sa tunga ninyo kon magbyahe, hello?  Ngaa man pag abot gid ninyo sa inyo balay, may barrier (pa) kamo?