By the Roxas City DRRMO
Siyudad sang Roxas—Sang Sept. 15, nagpatigayon sang on-site inspection sa aton Relocatable Containerized RT- PCR Laboratory ang Assessment Team sang Department of Health (DOH) kag Research Institute for Tropical Medicine (RITM).
Ini isa ka compliance requirement agud mahatagan kita sang License to Operate para sa aton kaugalingon nga Covid-19 Testing Lab.
Ini nga team ginapangunahan ni Dr. Jose Eugenio Hautea kaupod sanday Arch. Rene Leonado kag Ms. Michelle Casagan sang DOH—subong man Ms. Joan Bato kag Engr. Archie Reyes sang RITM.
Nalipay kami sa City Government bangud positibo ang ila nangin feedback sa Engineering, Physical, Biosafety and Laboratory Readiness sang laboratory.
May minor gaps na lang kita nga dapat pun-an agud mas mangin matalunsay ang operasyon.
Gindayaw man sang assessment team ang aton tikang sa pag-establisar sang kaugalingon nga RT-PCR Laboratory.
Suno kay Dr. Hautea, iya na ginapanan-aw nga makasugod na kita sang testing sa labing madali nga panahon matapos nga matuman naton ang ila mga rekomendasyon.
Ini pagasundan na gilayon sang proficiency test sang magadumala sa laboratoryo.
Tinguhaan gid naton nga antes ang pagtakup sang bulan sang Setyembre maka-operate na kita kag indi na maghulat sang malawig sa pagpaguwa sang resulta sang aton mga RT-PCR Tests. (Roxas City DRRMO)
