Ni Ace Neil B. Borda
Ako, ikaw, kita bala ayhan mga matuod nga Capiznon? Pamangkotanon nga daw mahapos sabton, apang sa dalum sang pulong, may ginahingadlan indi lang lugar, kundi kalag kag pagkatawo.
Ang Capiz indi lang baybayon nga naga silak sa adlaw, indi lang ulumhan nga naga hamyang sa kapatagan, kundi kasaysayan nga ginbantayan sang panahon, kag ginahingadlan sa dughan sang katawhan.
Dumduma ang mga sugilanon sang aton ginhalinan, mga epiko nga nagahibi sa hangin sang kagab-ihon, ilog sang mga istoryahanon sa Hinilawod kag Sugidanon.
Kita bala matuod na nga Capiznon kung kita mangin ilog kay Labaw Dunggon, nga nakipag bato kay Saragnayan para sa iya pinalangga si Malitong Yawa, Sinagmaling Diwata o kudi man ilog kay Dapae-Dangaw nga miskan sa iya kagamayon nag pakita sang kaisog kag kakusog sa gilayon?
O ilog sa mga Amburukay nga nag pakita sang ila pag palangga kag pag hatag importasya sa ila mga binukot kag tuos?
Kung kita mag pakita sang mga bagay nga ila gin pakita, kita bala ayhan matawag na nga matuod nga Capiznon? O kon ginadala mo ang pagkamabinuligon, kon ginatamod mo ang imo ginikanan kag komunidad, kon ginapabilin mo ang pagrespeto sa kultura kag kasaysayan sang aton probinsya.
Ah, amo na ini siguro ang sabat. Kay ang pagiging Capiznon, indi lang ginahambal kundi ginapakita. Sa tinaga nga malumo, sa buhat nga may prinsipyo, kag sa kabuhi nga ginahalinan sang dungog. Kag sa ulihi, ini nga pagkatawo, indi dapat mapatay sa paglipas sang panahon. Dapat ini batonon sang masunod nga henerasyon, daw sulo nga ginapasa
Nagahatag kahayag sa dalan nga ila pagalakton. Kay ang matuod nga Capiznon, may madalum nga paghangup sa iya ginhalinan, kag may kusog nga panimuot nga dal-on ini padayon.
Kamo akon pamangkoton: Kamo bala ayhan handa na mangin angay sini? Kag ipabugal sa
bugkos kalibutan: nga ako nilahi nga Capiznon!
