ROXAS CITY — Kapin sa P300,000 nga financial assistance ang ginpanagtag sang talatapan sang bise gobernador para sa 104 ka mga kubos kag labi nga nagakinahanglan nga mga benepisyaryo sang probinsiya.
Sa ginhiwat nga simple nga programa sa Capiz Provincial Capitol nga ginpangunahan ni Vice Governor James “Mitang” Magbanua, personal sini nga ginhatag ang financial assistance para sa mga Individuals in Crisis Situation ukon AICS kon sa diin naglab-ot sa P278,000.
Sa First District, 64 ka mga benepisyaryo ang nakabaton sang assistance nga naglab-ot sa P156,500 samtang 40 naman ka mga indibidwal ang gikan sa Second District nga may kantidad nga P122,000.
Suno kay Magbanua, apisar nga limitado ang pondo sang iya talatapan, iya gid gintinguhaan nga makapain sang pondo para sa mga AICS agud makahatag bulig sa mga pigado labi na gid karon nga may krisis.
Kasunod sini, nagturn-over man sang knapsack sprayers sa mga mangunguma ang bise gobernador sa Barangay Tapulang, Maayon Capiz kung sa diin dako man ang pagpasalamat sang mga barangay officials sang nasambit nga barangay sa nabaton nga bulig.*
