Siyudad sang Roxas—Nakaabot na sa Roxas ang siyam ka overseas filipino workers (OFW) repatriates nga na-stranded sa Cebu matapos nga nakumpleto nila ang mga ginakinahanglan nga dokumento halin sa Cebu government lakip na ang exit pass.
Sakay sang special flight nga gin-arrange sang Roxas City government sa Cebu City government, nag-abot ang walo ka seafarers sa Roxas City Airport takna 3:30 sang hapon kag isa naman ang sakay sang barko nga nagdungka sa Iloilo City takna 1:30 sang hapon nga ginsugat sang salakyan sang City Disaster Risk and Reduction Management Offoce.
Ang mga nag-alabutan nga OFW diri nagtinir sa Cebu sang naglab-ot duha ka bulan sa idalum sang Enhanced Community Quarantine (ECQ) sa bug-os nga Western Visayas angut sa Covid-19.
Matapos nga makompleto nila ang ila quarantine period sa Cebu kag nagpaidalum sang Reverse Transcription-Polymerase Chain Reaction (RT-PCR) test kon sa diin lunsay negative ang resulta, nakauli na sila diri sa siyudad.
Apisar nga nakapaidalum na sila sa RT-PCR test didto sa Cebu apang pag-abot nila diri kaina, gilayon naman nga ginpaidalum sila sa gihapon sa Rapid Test.
Sa karon, yara sila tanan sa quarantine facility nga ginpreparar sang siyudad sa Brgy. Milibili agud magpaidalum liwat sang 14-day quarantine period.
Nakompleto naman sang una nga hugna nga ginalikipan sang anom ka OFWs repatriates ang 14-day quarantine period kag nakauli na sila sa ila tagsa ka puluy-an. (Edalyn Acta/ Capiz Times)
