Nagliwat nga nangin sentro sang diskusyon ang EDSA bangud sang rally nga ginhiwat sang Iglesia ni Cristo (INC) bilang suporta kay Rodante Marcoleta. Bisan yara sa katungdanan sang tagsa ka pumuluyo ang mapisanon nga pagpahayag sang ila opinyon, dapat nga ang batas kag ang nagakaigo nga proseso ang mangin labaw sa bisan ano nga impluwensiya sang protesta.
Madamo sang mga empleyado ang nalate sa ila trabaho, samtang pila ka mga estudyante ang wala nakaabot husto sa ila klase bangud sang natabo.
Bilang isa ka demokratiko nga nasyon, wala kaangut nga problema ang pagpahayag sang suporta paagi sa protesta. Ang problema nagaguwa kun ang isa ka aksyon nagahatag sang dako nga kabudlayan sa iban nga tawo.
Ang katungdanan sang isa ka grupo sa pagpahayag sang ila tingog dapat may kaangut nga responsibilidad kag konsiderasyon sa kaayuhan sang publiko.
Kinahanglan ang mas maayo nga koordinasyon sa mga awtoridad antes magpatigayon sang malapad nga pagtililipon. Pinaagi sa mathag nga plano kag epektibo nga pagdumala, mahimo nga mapahagan-hagan ang epekto sini sa mga empleyado, estudyante, kag iban pa nga ordinaryo nga tawo.
Sa katapusan, indi ang pinaka mabaskog nga tingog and dapat pamatian, kundi ang kamatuoran nga dapat ampigan. Ang hustisya nga aton gusto maangkon indi dapat maimpluwensyahan sang may mataas nga posisyon. Ang matuod nga demokratiko nga nasyon wala sang sin-o man – mangin opisyal, organisasyon, o ordinaryong pamuluyo– ang dapat mangin mataas sa batas. (Mga interns: Lea Olino, Aslen Caharop, Shane Villarico, kag Marlon Tirol)
