By Nycel Jane Dela
Sa kada bukas ko sang Facebook, pirmi na lang ako makabasa sang balita nga may napatay o nasamaran sa dalanon. Umpisa palang ang bulan sang Mayo, pero grabe na gid ang sunod-sunod nga mga aksidente. Makaluluoy ang mga nadulaan sang kabuhi kag mas doble pa ang kasakit sang mga pamilya nga nabilin. Isa ini ka realidad nga indi na naton madeny, daw adlaw-adlaw may disgrasya.
Isa sa pinaka-grabe nga trahedya ang natabo sang Mayo 1 sa Subic-Clark-Tarlac Expressway. Isa ka bus ang nag-araro sa pila ka salakyan nga nagahulat sa toll gate. Ginsiling sang driver nga nakatulog siya. Makasulubo nga patay gid ang 12 ka tawo, 37 naman ang napilasan, kag isa sa mga survivors ang duha ka tuig nga bata—nga ang iya amay kag iloy upod sa mga napatay sa aksidente.
Isa pa gid ka balita sang Mayo 4 nagapakita kun paano ang kabuhi madula lang sa isa ka pamisok. Sa NAIA Terminal 1, isa ka SUV ang nakabunggo sa isa ka lima ka tuig nga bata upod man sini ang iya iloy. Nabilin ang amay nga naghilibion gid sang grabe. Isa naman ka pamilya ang nabuka, isa naman ka kasakit ang nagdugang sa listahan sang mga trahedya sa dalanon.
Diri man sa aton, sa Capiz mismo, pila na gid ka aksidente ang nadokumento sulod lang sa pila ka adlaw sa pag umpisa sang Mayo. Damu nga kabuhi ang ginbaylo sang isa lang ka segundo nga kapabayaan.
Ang pamangkot: ngaa damo na gid subong sang aksidente? Wala bala sang insakto nga pahuway ang mga driver? Wala sang husto nga pagmintinar sang salakyan? Kulang bala sang disiplina sa dalanon? Kun tuman ka gamay ang oras nga tulog, kag sobra naman ka oras ang biyahe, anhon mo pa na kun ang driver indi na alerto?
Pero indi lang ini problema sang driver. Kita man nga mga pedestrian kag pasahero may parte sa solusyon. Dapat disiplina, responsibilidad kag respeto sa kabuhi sang iban ang una naton nga paminsaron. Kay kun indi ta ni paghimoon, basi buwas, kita naman ang headline.
