
Daw masyado na gid kainit subong sang pamulitika diri sa Capiz. Madamo sang balita, reklamo, pabati-bati, habuyanay sang mga indi maayo nga istorya.
May ara alegasyon nga ang anay mayor sang isa ka banwa, nag pang saputi kuno sa isa ka Brgy. Kagawad sa sulod ka munisipyo.
Madasig gin panginwala sang anay nga mayor ang alegasyon.
Suno sa isa ka witness nga empleyado, nag sulod si Brgy. Kagawad sa Office of the Mayor. Nag pamangkot kuno ini kon kamusta na ang pag proceso sang mayor’s permit sang iya utod—nga negosyante pareho sa iya.
Hinambalan ang Brgy. Kagawad nga kulang sang dokumento nga Audited Financial Statement (AFS) papeles sang iya utod. Didto nag-ursa kuno dayon si Brgy. Kagawad. Pila na kuno ka adlaw nga binalik-balik nia agud mag pag proseso sang mayor’s permit sang iya utod.
Natabuan nga ara man didto sa ang anay nga mayor nga nag bisita sa iya nga asawa (ang incumbent Mayor).
Nabati-a sang anay mayor ang pag-ursa sang naga reklamo nga Brgy. Kagawad. Didto dason naka hambal ang anay mayor sa Brgy. Kagawad nga nakahibalo na ang iya utod kon ano ang kulang nga papeles.
Nag sabat pa guid dason ang Brgy. Kagawad ngaa ang iya lang sang utod nia nga permit ang indi ma-approbahan.
Didto dayon kuno nag umpisa ang kinagamo, pero wala man nakita sang empleyado nga gin tampa sang anay mayor ang Brgy. Kagawad.
Pero sa interview sa isa ka radyo station sang gobyerno, ginpamatud-an sang Brgy. Kagawad nga gin tampa gid kuno siya sining anay nga mayor. Indi man kadumdum kon gin sumbag siya kag natatapan nalang nia nga may dusngil na ang iya bibig pag gwa nia didto sa opisina sang mayor.
Suno pa gid sa kay Brgy. Kagawad, na pikon ang anay mayor sang sagi siya pangayo sa listahan kon ano gid mga kulang nga dokumento para sa permit sang iya utod.
Pero sa pahayag naman sang incumbent Mayor, ginturo-turo pa ni Brgy. Kagawad ang iya tudlo sa iya kag sa anay mayor. Suno sa incumbent Mayor, wala na sang respeto ang Brgy. Kagawad sa ila nga mag asawa—bilang incumbent Mayor kag anay mayor.
Wala lang kita kabalo kon sin-o gid ang matu-od tuod nga naga sugid sa tunga sang duha ka partido. Ang nag reklamo nga Brgy. Kagawad? Ukon ang gina reklamo nga anay mayor? Pero kon may mabakod nga ebidensya, dal-on nalang nila tani ina sa husgado.