Ni Edalyn B. Acta
Indi kamo mag padala-dala sa mga politiko nga naga suksok sang maskara!
Sang Marso 28, nag-umpisa na ang lokal nga kampanya kag sa maabot nga Mayo 12, maga pili kita sang aton mga kandidato: senador, congressman, governor, vice governor, lima (5) ka mga board members sa inyo tagsa ka distrito, kag sa party-list.
Sa mga kabanwahanan o sa siyudad, maga pili kita sang mayor, vice mayor, mayor kag sa mga konsehal.
Sang nag-umpisa ang kampanya serye halin national, tubtub lokal, kada abri ko sang akon cellphone, puros nalang hitsura sang mga politiko ang akon nakita.
Amo man kon magtan-aw ako sang TV. Sa isa ka minuto, pila ka propaganda sang politiko ang naga gwa. Daw halos ubuson na gani niya ang oras sang isa ka teleserye.
Kon mamati ka naman sa radyo, daw halos ma paktan mo na ang ila propaganda kay sagi nga balik-balik lawag.
Pero sa akon nakita kag nabati-an, daw pulu-pareho ma lang gani ang ila promisa kag handum: mag serbisyo sang “TAMPAD”.
Apang ano bala ang basehan sang gina tawag nga tampad nga pag serbisyo? Kon ako pamangkoton, simple lang: ihatag lang nila sa pumuluyo ang naga-kadapat para sa pumuluyo.
Pareho sang mga benepisyo nga dapat ma-agum sang pumuluyo. Dapat palareho kag wala sang pinili-an. Nag boto man sa politiko ukon wala.
Kon matuod man ang ila pag serbisyo, dapat indi na kinahanglan sang pumuluyo magluhod-luhod sa ila. Ang gina sweldo sa mga nag daog nga opisyales,halin sa sa kaban sang inyo munisipyo, siyudad, ukon probinsya. Kwarta sang pumuluyo!
Ang nabayad naton nga taxes, na gasto lang ka politico! Indi dapat mag hampang sila
panagu-ay kon ang pumuluyo ga kilanglan sang bulig! Napa balik-balik ang pumuluyo!
Ang problema abi sang iban nga mga politiko, kon naka pungko na sila pwesto, nalipatan na nila.
Ang promisa nila nga tampad nga pag serbisyo, na bayluhan na sang pag pakuno-kuno.
Daw kada kampanya man lang sila kadumdum sa aton. Dira lang sila mag pabatyag sang ila mga matam-is nga yuhom, ang ila hugot nga paghakos kag pagpangamusta. Makadto pa sila sa imo balay bisan malayo na ang lugar.
Kon kampanya man naga guluwa ang mga kadamo nga ayuda kag! Makibot ka lang may gapang lista na! Pareho sining TUPAD, AKAP, Bugas, Gatas, Sud-an, kag iban pa! Pero pag tapos eleksyon, tan-awa ninyo bala!
Gani sa aton mga kasimanwa, inyo gid binag-binaga kon sin-o ang inyo pili-on.
Botoha ang mga politiko nga sa banta ninyo, may hinimu-an nga maayo. Inang poltiko nga kon palapitan mo. wala naga hampang sang panagu-ay. Inang naga yuhom sa imo nga indi lang sa ti-on sang kampanya.
Indi kamo mag padala sa mga matam-is lang nga estorya! Indi naton pag papungku-on ining mga politiko nga doble kara kag naga suksok sang maskara.
Ilabi na gid, indi kamo mag salig sa mga naga hatag sa inyo sang kwarta kay sigurado ako pag daog nila, dako pa sina ang ila ginansya.
Indi ninyo pag-usiki ang inyo hamili nga boto bangud pila naman ka-tuig ang aton antuson!
