Wala sang sin-o ang makapakot kon san-o maga-abot ang kalamidad sa aton lugar. Ano ang aton obrahon kon umabot ini sa aton?
Kon ako ang pamangkoton, una ko gid nga ginahimo ang magpangamuyo sa Gino-o. Ginapangabay ko sa Gino-o nga untaton na ang mabaskog nga ulan, hangin ukon linog man nga aton nabatyagan.
Apang sa aton mga opisyales sang gobyerno, labi nagid ang mayor kag gobernador kabalo ako nga indi lang sang pangamuyo ang ila sini ginapanumdum kundi kon paano mabuligan ang mga pumuluyo nga ila nasakupan.
Kapin pa kon dako kag madamo ang halit sang kalamidad sa ila nasakupan, syempre galibog ang ila ulo sang panumdum kon paano nila mahatagan sang bulig ang tanan.
Diri sa Capiz, bag-o lang natapos nga pag-inulan sang mabaskog kag baha dala sang bagyo nga Ramil. Kag sa akon obserbasyon, halos bug-os nga mga balay sa tanan nga kabarangayan diri apektado gid.
Wala sang mag ginlapasan ang baha nga mga panimalay, opisina, negosyo mga malls lakip na dira ang aton mga hospitals, tanan ginsulod sang tubig ang ila balay kag ang nagkadto na sa nga evacuation center kay daw halos mata-op na ang ila balay sang tubig.
Tungod nga nagadalum ang tubig kay natub-an pa sadto nga dalaw sang October 18, mataas ang level sang tubig (high tide), may mga kauturan kita nga nagbiya sa ila balay kag nagkadto sa evacuation center. May mga na-record pa gani nga mga patay sa iban nga mga kabanwahanan.
Apisar nga amo na ini ang natabo sa aton nga may kalamidad, apang may mga kauturan kita naga-obra pa ya sang indi manami nga estorya sa social media.
Naga-obra ini sila sang mga peke nga account kag magpina-buang sang istorya.
Hala gid binasol sang aton gobyerno, pareho sang wala gid kuno plano ang aton gobyerno, nagakurakot naman kuno ang gobyerno, indi kaldo ang solusyon para sa baha, kag I-post ini dayon.
Makita mo dayon kon ano kadamo ang nagasakay sang amo nga issue. Hay, ano imo purpose?
Bal-an naman naton nga subong nga panahon halos tanan nagtutok sa social media, madamo dayon ang nagasaw-saw sang istorya. Ang resulta indi na makapanumdum sang maayo ang aton gobyerno kon ano pa ang maayo nga obrahon kay nawili naman to magsinabat sang mga istorya nga gina-haboy sa ila.
Muna ang gusto ko ipamangkot sa inyo? Muna bala ang inyo dapat unahon kon may naga-abot nga kalamidad? Baw indi gid manami.
Kon wala ka man lang may ibulig kag nagatutok nagidman kamo sa social media, tani ang i-post ninyo ang mapuslanon man, pareho sang kon paano sila makakuha sang ayuda. Sigurado pasalamatan ka pa nila!
