Nasuspinde ang anom ka players sa On ‘D Move (ODM) Sports League tournament bangud sa inaway nga natabo kagapon.
Natabo ang away sa hinampang Commissioner Luis R. Asis National High School (CLRANHS) kag Culasi National High School (Culasi NHS) sa under-17 category.
Ang mga suspendido kag ang ila nga suspensions ang mga nasunod:
- One-game suspension para kay jersey #6 sang CLRANHS bangud sa pagsumbag
- One-game suspension para kay jersey #9 sang CULASI NHS bangud sa pagsumbag
- One-game suspension para kay jersey #21 sang CLRANHS bangud sa pagsumbag
- One-game suspension para kay jersey #14 sang CULASI NHS bangud sa pagsipa sang isa ka player
- One-game suspension para kay jersey #17 sang CULASI NHS bangud sa pagsipa sang isa ka player
- Two-games suspension para sa isa ka player nga may jersey #13 sang CPC bangud sa iya pagsulod sa basketball court kag sa pagtinguha nga manumbag bisan hindi siya kunektado sa nga duha nga nasambit nga buluthuan.
Suno sa post sang ODM Sports League, makakuha sang severe nga penalidad ang mga magahimo sang kinagamo.
“The name on the front is a lot more important than the one on the back,” hambal sang management sang liga sa ila Facebook post.
“Violence has no place in the world of sports,” dugang pa sang liga.
Naghinyo ang liga sa tanan nga coaching staff sang tanan nga team sa liga nga dapat may pagsakdag sa professionalism sa tanan nga ti-on.
“Always remember that each team is representing different schools and personalities and this league is just an avenue to expose them to the public. Please control your ranks,” dugang pa sang liga.
Pwede masuspinde sa kabug-usan sang tournament ang mga nasambit nga player kon ila pa ini liwaton.
