By Nycel Jane Dela
“Ahh, taga Capiz ka gali? Damo kuno aswang da, ‘no?”
Amo gid na halos pirmi ko mabatian kada may maka estorya ko nga indi taga Visayas. Daw automatic na bala nga kon mabatian nila ang “Capiz,” ang sunod gid dayon nga panumdomon amo ang “aswang.” Indi na gani nila kinahanglan maghunahuna anay. Daw nakatatak na gid sa ila paminsaron nga ang Capiz indi probinsya sang matahum nga baybayon, seafood, kag matinlo nga kultura kundi lugar sang mga kahadlokan kag istorya nga ginapasa-pasa halin pa sang una.
Sang nagkadto kami sa Luzon upod sang akon mga classmates nga taga Capiz man, amo man gyapon ang amon na eksperyensyahan. Tungod lain ang amon hambal, syempre namangkot sila kon diin kami halin. Sang nagsabat kami nga “Capiz,” nagkadlaw anay sila kag naghambal, “Totoo ba talaga ‘yung mga aswang diyan?”
Sa tuod lang, naanad na’ko. Pero bisan naanad na, may gamay gyapon nga pagdismayado sa sulod. Kay ngaa bala amo gid na ang una nila nga nahunahunaan? Daw wala na gid iban nga pwede irelate sa amon probinsya.
Wala nila nakita nga ang Capiz amo ang “Seafood Capital.” Wala nila nabal an nga damo diri talento, matinlo nga mga baybayon, kag mga tawo nga mabuot kag maalwan. Wala nila nakilala ang mga estudyante nga nagapaninguha, mga manugpangisda nga nagapangabudlay adlaw-adlaw, kag mga ordinaryo nga Capizeño nga gusto lang man respetuhon ang ila lugar.
Masubo hunahunaon nga asta subong, ang iban nga tawo daw ginakabig nga komedya ang identidad sang Capiz. Kon may horror story, Capiz dayon. Kon may aswang nga sugilanon, Capiz naman. Daw indi kami makahalin sa imahe nga ginpundar sang mga pelikula kag sinang-una nga istorya.
Amo gani nga may mga tion nga daw gusto ko nalang maghambal nga “taga Iloilo” ukon “taga Bacolod” para wala na madugang nga pamangkot. Pero sang ulihi, narealize ko nga indi dapat ako mahuy-an nga taga Capiz ko. Indi man kami responsable sa mga sugilanon nga ginpatihan sang iban. Ang importante, kabalo kami kon ano gid ang matuod.
Ang Capiz lugar sang mga tawo nga may kultura, kag dignidad. Kag basi oras naman nga indi aswang ang una nga makita sang tawo kon mabatian nila ang ngalan sang amon probinsya, kundi ang matuod nga katahum sini.
