By Nycel Jane Dela
Sang Abril 12 tubtob 19, ginhiwat ang Capiztahan 2026 sa probinsya sang Capiz. Isa ka madinag-on kag masidnadyahon nga selebrasyon nga ginpuno sang kasadya, kultura, kag pagtililipon sang katawhan. Sa Roxas City, labi gid nga nangin sentro sang mga aktibidad ang Pueblo de Panay, nga sa ikaduha nga tuig gin-host sang nagkalain-lain nga pasundayag. Wala sing duda ang kabaskog sang turismo, buhi ang ekonomiya, kag napakita ang talento sang Capizeño.
Pero sa pihak sini nga kasadya, may isa ka realidad nga indi malikawan: ang basura nga nabilin pagkatapos sang selebrasyon. Sa tagsa ka kanto, may makita ka nga plastik, papel, kag mga disposable nga ginpabay-an. “Basura diri, basura didto”—indi na ini bag-o nga eksena, kundi isa ka padayon nga problema nga ginapabay-an naton.
Gani ano gid bala ang ginaprioridad naton, ang kasadya ukon ang responsibilidad? Natural lang nga may madamo nga tawo sa amo sini nga okasyon, pero indi ini rason agud pabayaan ang katinlo sang aton palibot. Ang problema indi lang yara sa kakulang sang basurahan ukon manpower sang local government. Ang mas daku nga isyu amo ang disiplina sang tagsa ka pumuluyo kag bisita.
Kon may disiplina kita sa pagpila para sa pagkaon ukon sa pagkuha sang litrato, ngaa indi naton mahimo nga i-practice ang simple nga paghaboy sang basura sa husto nga lugar? Indi kinahanglan nga may magbantay anay antes kita maghimo sang insakto. Ang pagrespeto sa lugar nga ginakadtuan naton isa ka batakang pamatasan nga dapat ginatudlo kag ginapakita.
Ang Capiztahan indi lang dapat makilala sa kasadya kag kadungganan, kundi pati man sa disiplina kag responsibilidad sang iya katawhan. Kay sa ulihi, ang indi naton ginpanumdom subong amo ang aton pagabatonon buwas.
Gani matapos ang musika kag mapatay ang mga suga, ano gid bala ang gusto naton nga mabilin, matahum nga handumanan ukon tambak sang basura?
