By Shane V. Villarico
Sa tagsa ka adlaw nga may estudyante nga naga pungko sa sulod sang klasrum nga may kahadlok sa iya tagipusuon, may isa naman ka bully nga naga huna-huna nga ang iya ginahimo isa lamang ka binuang. Apang para sa biktima, ang tagsa ka pagkutya, pag-insulto, kag pagpakaulaw indi kaladlawan. Ini nagabilin sang samad nga indi makita sang mata, kundi mabatyagan sang tagipusuon.
Ang bullying indi dapat kabigon nga binuang ukon normal nga parte sang pag-eskwela. Ini isa ka seryoso nga problema nga nagaguba sang kumpiyansa, kalipay, kag panghunahuna sang biktima.
Indi pabugal sang kusog ang pagpakaulaw sa iban. Ang matuod nga kusog makita sa pagrespeto, pag-intindi, kag pagkamaayo sa mga wala sang ikasarang nga magdepensa sa ila kaugalingon. Kinahanglan nga ang eskwelahan mangin lugar sang pagtuon kag pagpalangga, indi lugar sang kahadlok kag kasubo.
Ang kada estudyante may istorya nga wala naton nahibaluan. Gani antes kita maghambal ukon maghimo sang malain nga butang, pamalandungi anay kon ano ang epekto sini sa iban kun magapaayo bala ini? ukon magapalain?.
Ang eskwelahan dapat mangin lugar sang kalinong kag pagtuon, indi lugar sang pag ubra sang mala-in. Ang bullying matapos lamang kon ang tanan magdesisyon nga indi na ini pagbatunon kag mangin kabahin sang solusyon, indi sang problema.
