Ginpasidunggan ang probinsya sang Capiz sang Department of Health Western Visayas Center for Health Development (DOH WV CHD) bangud sa ila pag-implementar sang National Voluntary Blood Services Program (NVBSP) kagapon, Hulyo 3.
Pinakamataas sa Western Visayas ang Capiz bangud sa 15,296 blood donations sa tuig 2024. Ang nasambit nga numero ang nagabalor sa 1.87 nga porsyento sang populasyon sang probinsya.
Halin 2019, padayon nga nalapawan sang Capiz ang 1 percent annual blood collection target.
Ginhatagan rekognisyon ang Capiz sa 2025 National Blood Donors Month Collective Conference sa siyudad sang Iloilo.
Ang probinsya sang Capiz lang ang lugar sa Region VI nga nakaigo sang at least 1 percent blood donation target ang tanan nga munisipiyo kag siyudad sini.
Padayon nga nagahinyo ang Capiz Provincial Health Office (PHO) sa publiko nga suportahon ang voluntary blood donation program para makabulig sa ila kasimanwa kag sa kaingod nga mga probinsya.
Ginbaton nanday PHO NVBSP Manager Jay B. Agarrado kag Supervising Administrative Officer Ayr R. Altavas ang award.
Ang kolaborasyon sang gobierno probinsyal sa pagpanguna ni Governor Fredenil H. Castro pinaagi sa PHO nga ginapangunahan ni Dr. Alex T. Nolasco; ang Philippine Red Cross – Capiz Chapter sa administrasyon ni Mr. Raymundo P. Martinez, RMT; local government units; national government agencies; mga ospital kag iban nga health facilities; partners; kag stakeholders ang nakikita sang Capiz health officials nga rason sang kadalag-an nga ini.
(impormasyon kag laragway halin sa Capiz PHO)
