Roxas City, Capiz — Ginkilala kag ginpasalamatan sang mga katapo sang Capiz Sangguniang Panlalawigan ang nangin kontribusyon sang mga opisyal sang mga kabarangayan sa pagpakig-away kontra COVID-19.
Sa ginpasa nga resolusyon sang Sanggunian, bug-os nga ginsuportahan sang tanan nga Sangguniang Panlalawigan sa pagpanguna ni Vice Governor James “Mitang” Magbanua ang Resolution No.470 series of 2021 nga nagahatag sang pagkilala kag pagpasalamat sa tanan nga mga liga president, punong barangay, barangay kagawad, barangay health workers, tanod kag tanan nga mga frontliners sa probinsiya bangud sang ila dedikasyon kag serbisyo sa panahon sang pandemya.
Gintumod man sa resolusyon ang makadalayaw kag wala sang pagpangduha duha nga naghatag sang serbisyo sa mga pumuluyo ang mga opisyal kag empleyado sang mga kabarangayan apisar nga nabutang sa alang-alang ang ila seguridad bangud sang makamamatay nga virus.
Samtang, nagpasar man sang resolusyon ang Capiz SP agud suportahan ang pagpangayo sang bulig gikan kay Senador Bong Go agud sa pagpatapos sang konstruksiyon sang Roxas Memorial Provincial Hospital.
Ang nasambit nga proyekto ang kabahin sang Annual Investment Program nga naaprubahan sang probinsiya sang Capiz.*
