Mabalik na buwas, Hulyo 11, ang klase kag obra sa Capiz State University (CapSU) Roxas City Main Campus kag Central Administration pagkatapos nga nakaagi ini sang bomb scare subong, Hulyo 10.
Suno sa public information office sang CapSU, ginhatagan na sila sang clearance sang Roxas City PNP – Explosive Ordnance Disposal (EOD)/K9 unit.
Kagaina sang aga may nabaton nga mensahe sa app ang isa ka faculty member sang CapSU.
Ang Campus Security Office ang nagpahibalo sa management nahanungod sa insidente, kag ila man ini ginpahibalo sa mga empleyado kag mga estudyante, nga nagresulta sa pagguwa sang tanan sa campus.
Nagkoordinar man ang security office sa Capiz Provincial EOD kag K9 unit sang Philippine National Police. Ang CAPSU Disaster Risk Reduction Management Office (DRRMO) nagistorya man sa mga partner agencies para sa posible nga kinanglanon nga bulig.
Ginsuspinde dayon ni University President Df. Efren Linan ang klase kag trabaho para sa proteksyon sang tanan.
Kagaina 1:35 p.m., ginuntat na sang Capiz Provincial EOD kag K9 unit ang ila pagpangita sang posible nga bomba sa lugar kag gin-clear na nila ang campus.
Ginpasalamatan sang CapSU ang Capiz Provincial EOD kag K9 unit sang PNP, mga taga-SWAT, Bureau of Fire Protection, kag iban pa nga ahensya kag local government units para sa ila pagresponde.
Ginpasalig sang CapSU nga nagapanguna nga prayoridad sang unibersidad ang proteksyon sang ila mga estudyante, faculty, kag staff.
