Dayao, may 2 na nga kaso sang COVID-19

Siyudad sang Roxas—Duha na ang nagpositibo sa kaso nga Covid-19 sa Barangay Dayao diri.

Ini amo sanday PUI No. 32, 60 anyos, nga napatay sang Marso 28, 2020 kag si HRC No. 5, 25, nga yara naka-quarantine sa Roxas Memorial Provincial Hospital (RMPH) subong. Lunsay mga taga-Barangay Dayao kag pareho nga may history sang travel kag exposure sa mga lugar nga may kaso sang Covid-19.

Sa Facebook Live Presscon nga ginpatigayon ni Roxas City Mayor Ronnie Dadivas, iya sini ginkompirmar nga duwa na ang positibo sang Covid-19 sa Dayao—rason nga ipaidalum niya ini sa Extreme Enhanced Community Quarantine.

Ano bala ining extreme enhanced community quarantine? Buot silingon, ang Dayao ginpaidalum na sa gintawag nga Red Zone kon sa diin pagasaraduhan na ang mga border sini nga barangay kag wala na sang may makagwa ukon makasulod nga mga tawo diri.

Ang gobyerno sang siyudad magapahamtang naman sang Police ukon Army agud maistrikto gid ang pagbantay kag pagmonitor sa mga residente.

Ang mga salakyan  pakadto kag pagwa sa barangay temporaryo nga suspendiron apang ang pakadto sa Libas kag Barra puwede makaagi basta magpakita lang sang ila Home Quarantine Pass (HQP).

Ang mga tindahan sa sina man nga barangay indi na magbukas.

Ang HQP sa area kag sitio sang may positibo nga kaso sang Covid-19 pagasuspendiron man agud indi na sila pagtugutan nga makagwa sa ila balay.

Tungod indi sila ka gwa dira sa ila mga panimalay,  ang gobyerno sang siyudad amo na ang bahala  magaprovide sang ila basic necessities.

Gindugang man ni Dadivas nga posible magalawig naman ang Enhanced Community Quarantine kon kinahanglan. Gintawag man niya nga fake news ang mga nagapalapta sang estorya nga siya nakakontak sa positibo sang COVID-19.