Kamusta man ang aton mga pumuluyo diri sa probinsya sang Capiz pagkatapos sang tatlo ka asus-asud nga bagyo nga nag-agi?
Una, ang Bagyong Ramil kon sa diin kalabanan sang mga pumuluyo diri sa Roxas City kag probinsya sang Capiz halos apektado sang malapnagon nga baha.
Ikaduha, ang Bagyong Tino kon sa diin ang Roxas City kag Capiz ginpaidalum naman sa storm signal Number 3.
Ikatatlo, amo ang Bagyong Uwan, apisar yara lang kita sa signal number 1 apang sa gihapon apektado ang mga pumuluyo labi nagid ang ara nagapuyo sa higad sang dagat. Makita naton nga may mga nagkalaguba pa gani nga mga baroto kag ang mga ginabularan sang uga, ubos gid ni bagyo tino dira sa Baybay, Dumulog, Cogon kag Punta Cogon.
Madamo sang mga pumuluyo ang nagkadto sa mga evacuation center kag ginbaya-an ang ila panimalay.
Ginapanginbulahan ko ang aton mga rescue team sa tanan nga mga Municipyo kag subong man diri sa siyudad kay tungod sa ila preparasyon pag-abot sang kalamidad. Tungod sini wala sang mga dalagko nga insidente nga natabo.
Pero pagkatapos sang bagyo, madamo nga reklamo ang akon nabati-an. Umpisa palang sa Bagyong Ramil kon sa diin ginpaidalum ang probinsya sang Capiz kag Roxas City sa “State of Calamity”.
Ano bu-ot silingon kon ang isa ka lugar gin-paidalum sang State of Calamity? Buot silingon sini nga ang pagdeklarar sang “State of Calamity”sa isa ka lugar, ginapasugtan ang aton gobyerno nga gamiton insigida ang ila Calamity Funds agud mahatagan insiga sang bulig ang mga apektado nga nga pumuluyo.
Wala man kita kabalo kon pila ang ila ginpain nga kwarta sa ila deklarasyon sang State of Calamity.
Kag base sa report sang Department of Budget and Management (DBM), naghatag sila diri sa aton sa Capiz sang P50 Million.
Pag-abot diri sa Capiz ni DSWD Secretary Rex Gatchialian, suno sa iya nga mahatag ang ila opisina sang tig P10,000 kag P5,000 sa tanan nga apektado sang Bagyong Ramil matapos ang deklarasyon halin sa probinsya kag siyudad.
Pero antis sila maghatag sang nahinambitan nga bulig hulaton kuno anay nila ang pinal nga listahan halin sa Local Government Unit (LGU) kon sa diin ang Local Social Worker ang magapili kon sin-o gid anga nagakadapat nga hatagan pagkatapos nila mapamatud-an nga ikaw apektado sang kalamidada.
Apang ano ang balasehan sang aton Social Worker nga mapamatud-an nga ikaw isa ka apektado sa inyo Barangay?
Syempre suno sa ila, ang ara nag evacuees sa Barangay Hall amo ang nagakadapat nga hatagan ayuda. Kag ang iban nga apektado ginappirma sang Disaster Assistance for Family Access Card (DAFAC) Form, kaupod ang xerox copy sang National ID nga may tatlo mo ka pirma.
Tungod indi man masarangan sang Social Worker nga magkadto sa kada balay sang pumuluyo sa Barangay, agud mangusisa kon matu-od ang nakabutang sa tagsa ka DAFAC Form, nagpabulig ini sila sa Barangay Health Worker (BHW) agud magpanglista kon ayhan apektado gidman ang mga nagpirma didto sang DAFAC form.
Karon diri na nagkaproblema ang mga pumuluyo kaysuno sa ila pag-abot sa listahan sang mga BHW. Gina-una kuno nila ang ila nga pamilya? Kag apin ni kapitan sa politika?
Matu-od ayhan ini? Kon kontra gani goobye ayuda na kuno? Baw nano man? Tani mangin patas lang kita sa mga pumuluyo pag-abot sa ayuda kay bal-an man naton nga kon apektado ka sang baha, bu-ot silingon apektado man ang imo kalapit balay. Alangan man nga likawan sya ya sang tubig.
Kag isa pa, ang bulig nga ina halin na ya sa DSWD! Indi kay Kapitan, indi kay Mayor ukon kay Gobernador. Kwarta man gani naton nga ginabayad sa taxes ang ginabakal sina nga mga ayuda.
