Mag paglaom ayhan?

Sa sini nga tini-on, wala sapayan nga medyo malayo pa ang Mayo 2025 nga pinili-ay, pero malapuyot na ang kampanyahanay sang mga politiko.
Pero ang ginabantayan sang tao: amo ang kandidatora nanday Paolo Roxas kag Cong. Howard Guintu sa una nga distrito sang Capiz.
Si Paolo, kilala nga anak ni anay senador kag DILG secretary Mar Roxas. Ang pamilya nila ang nag tanom
sang ila ngalan diri sa Capiz, kag nagtubo tubtob nag panggamot.
Samtang si Cong. Howard pamilya man sang mga tumandok diri sa Capiz. Kilala siya bilang representate sang Pinuno Partylist sa Kongreso. Sadto pa tayoyon na ang iya pag panagtag sang bulig sa mga tao, ilabi na kon may bagyo kag iban pa nga kalamidad.
Sa pigado nga mga pamilya, padayon man ang pagpanagtag ni Cong. Howard sang bugas kag kwarta sa mga namatyan kag na hospital. Luwas sina may mga medical mission man sya nga ginhiwat sa kabarangayan, kon sa diin libre ang serbisyo sang doktor kag bulong.
Gani, madasig nga naka establisar sang ngalan si Cong. Howard. Wala pa ang TUPAD program sang DOLE, nagahatag ayoda sa mga tao si Cong. Howard. May ayoda gani para pang gasolina sang tricycle drivers kag iban pa.
Apang si Paolo, nagatanyag man sang iya serbisyo sa tao. Gani upod siya kay Mayor Ronnie Dadivas kon mag panagtag sang ayoda nga bugas ang Siyudad sang Roxas.
Amo man kon magpanagtag ayoda ang gobyerno nasyonal–paagi sa lokal nga pangulohan– katulad sang TUPAD, ACAP, kag iban pa.
Pareho sila nga bataon pa kag nag eskwela sang ila korso sa Amerika. Pulopareho man ang kainit sang pagbaton sa ila sang mga tao.
Pero si Cong. Howard wala naga upod kon magpanagtag sing ayoda sa mga tao ang gobyerno nasyonal. Madugay na nga nakatukod siya sang makinarya gani nangin matam-is ang iya ngalan sa mga tao.
Sa pihak nga bahin, nangin madali ang pagkilala kay Paolo sa pag libot sa mga kabarangayan sa tanan nga banwa nga sakop sang unang distrito sang Capiz. Labi na sang pagbutang nya sang internet connection sa mga bolothoan.
Lantawon ta ang masunod nga eksena sa lakatsang politika, labi na ang sa unang distrito sang Capiz.