By Nycel Jane Dela
Sa kada pamangkot sang turista kon ano gid bala ang dapat tilawan sa Roxas City, daw automatic na nga sabat sang kadam-an amo ang seafood. Indi man ina malikawan kay kilala ang aton syudad bilang Seafood Capital of the Philippines. Kon makalab-ot ka sa baybayon sang Roxas, makita mo gid dayon ang nagalinya nga mga kalan-an nga may preska nga isda, alimango, hipon, kag iban pa nga lamang-dagat. Mas nami pa gid kon ang restaurant ara sa kilid sang dagat, kay may upod na nga view sang sunset kag hampak sang hangin samtang nagakaon ka.
Bilang nga naga-istar man sa Roxas City, naka try naman ako sang lain-lain nga kalan-an diri. May ara gid mga tion nga exciting ka mag-order kay daw ka nami sang pictures kag reviews, pero pag-abot sang pagkaon, daw kulang sa sabor ukon gamay ang serving. May iban nga mahal na gani, pero daw indi mo mabatyagan nga worth it ang imo ginbaydan. Amo na nga may mga kalan-an nga isa lang ka beses mo gid matilawan kag indi ka na liwat mabalik.
Pero siyempre, indi man tanan amo sina. Madamo man diri sa Roxas ang mga kalan-an nga makapaambit gid sang proud nga paminsaron mo nga “Amo ni ang seafood sang Roxas!” Ang iban gani indi kinahanglan mahalon ukon sosyal nga lugar. May ara nga simpleng pwesto lang pero ang timpla kag kapresko sang seafood daw direkta gid halin sa dagat pakadto sa imo lamisa. Amo gid na siguro ang sekreto sang pagkaon diri sa aton. Indi lang sa dekorasyon ukon ka sosyal sang lugar ginabase ang ka nami sang kalan-an, kundi sa sabor kag serbisyo.
Aminado man ako nga kon may suki na ko nga kalan-an, didto gid ko pirmi nagabalik. Pero bilang mahilig man magtilaw sang bag-o, gina try ko man ang iban nga restaurants nga nagauso ukon ginarekomendar sang mga abyan. May mga discoveries gid nga daw hidden gem bala. Mga lugar nga indi sikat sa social media pero makapabalik gid sa imo tungod sang ila pagkaon.
Pero syempre, indi lang man seafood ang ginabalikan sang mga tawo sa Roxas City. Ang experience man mismo. Ang pagpungko sa kilid dagat, pagkaon sang preska nga seafood, kag pagbatyag sang simple pero masadya nga vibe sang syudad. Amo ina ang sabor nga indi basta-basta malipatan. Kag siguro, amo man ina ang rason kon ngaa bisan damo na sang bag-o nga kalan-an, padayon gihapon nga ginbalik-balikan ang Roxas City.
