Sang Hulyo 7, ginaprubahan sang Sangguniang Panlalawigan ang resolusyon nga ginadeklara nga protected marine sanctuary ang Tucad Reef sa Pilar, Capiz.
May mga scientific assessments ang gobierno probinsyal pinaagi sa Capiz Provincial Environment and Natural Resources Office (CaPENRO) kag may koordinasyon sang Sentro Para sa Ikakaunlad ng Katutubong Agham at Teknolohiya, Inc. (SIKAT, Inc.) kag sang Department of Environment and Natural Resources (DENR) – Capiz.
Suno sa nasambit nga assessments, nakit-an nga “highly diverse and ecologically critical marine habitat” ang Tucad Reef.
Ginakabig ang Tukad Reef nga isa sa healthiest reefs sa rehiyon. Ini may 160 ka hektarya sang seagrass beds kag may mga 63 ka porsyento sang live coral cover.
Amo ini ang tikang sa pagprotekta sang Tucad Reef subong nga naaprubahan na ang resolusyon:
1.) Pagbawal sang makahalalit kag extractive activities pareho sang, pero hindi lang limitado sa, blast fishing, cyanide fishing, coral collection, illegal harvesting of marine species kag iban pa nga malain nga aktibidad sa designated nga sanktuaryo.
2.) No-take zone na ang Tucad Reef maluwas na lang kung pasugtan ang pagkuha sa kung ano ang ara dira para sa strikto nga siyentipiko ukon pang-conservation nga tinutuyo.
3.) Pagabutangan sang buffer zones kag mga boundary ang Tucad Reef sa pagpanguna sang munisipyo sang Pilar kag sa ila koordinasyon sang CaPENRO kag iban pa nga ahensiya sang gobierno.
4.) Paghimo kag pagsunod sa isa ka marine sanctuary managment plan para sa mga enforcement protocol, sustainable tourism guidelines, community involvement mechanisms, kag biodiversity monitoring programs.
5.) Iga-mobilize man ang Philippine National Police – Maritime Group, Bantay Dagat, kag iban pa nga law enforcement entities para sa proteksyon sang Tucad Reef.
6.) Paghimo sang education kag awareness campaign para sa komunidad, mangingisda, mga eskwelahan, kag tourism stakeholders para mapakita sa ila ang ecological nga balor sang Tucad Reef kag sa importansya sang marine conservation.
7.) Pagpangita sang pinansyal kag technical nga bulig halin sa mga ahensya sang gobierno kag mga international conservation partners para sa pagprotektar kag pag-restore sang Tucad Reef
8.) Pagsugod sang proseso para sa pagsulod sang Tucad Reef sa National Integrated Protected Areas System sa bulig sang DENR kag iban pa nga mga institusyon.
(laragway halin sa CaPENRO, impormasyon halin sa Ara si Mitang Facebook page)
