Magabukas sang mga oportunidad sa negosyo, trabaho, kag ekonomiya ang pagsulod sang international cargo vessel halin Vietnam direkta sa Roxas, hambal ni City Mayor Ronnie Dadivas.
“Ang pagsulod sang International Cargo Vessel direkta na sa Roxas magabukas sang madamo nga opurtunidad sa negosyo, trabaho, kag economic development. Magabarato ang presyo sang pila ka balaklon, makabenepisyo sa pumoluyo,” suno kay Dadivas.
Gindugang ni Dadivas nga gusto niya maging aktibo ang Culasi Port.
“We are opening the door for economic activity. Isa ka strategic nga lokasyon ang Roxas City, mas malapit sa Northern Iloilo, Aklan, Masbate kag Romblon. Gusto naton mangin aktibo ang Culasi Port,” hambal ni Dadivas.
Nagahandom si Dadivas nga tani damo pa nga transaksyon pareho sini ang matabo.
“Plus, may daku nga posibilidad nga maka-export kita kag ang aton lokal nga produkto sa Roxas City kag Capiz mismo ang pagadal-on naman naton sa iban nga pungsod,” suno kay Dadivas.
(Mga laragway halin sa Ronnie Dadivas FB page)
