Tingog sang mga estudyante
Sang damlag lang nagpanawagan ang mga Barangay Kapitan sa mga incoming 4th year college students nga mag apply sa Bagong Pilipinas Barangay Presidential Scholars Program.
Ang tagsa ka barangay sa bug-os nga Pilipinas may yara nga budget nga nagalab-ot sang P100,000 para sa education assistance kag tunga-on ini sa 5 (lima) ka benepisyaryo nga mga estudyante kag kon is aka sa mapili-an may allowance ikaw nga tig P20,000 kada isa.
Kon paano makasulod? Ang requirements amo ini: Dapat ang aplikante isa ka incoming fourth year college student, tumandok kag nakarehistro nga botante sang barangay, may minimum average nga 83% kag wala lagbong nga grado, kag dapat indi ka myembro sang 4Ps ukon indi ka skolar sang bisan ano nga pribado ukon gobyerno man nga talatapan pareho sang CHED, TES kag DOST.
Madamo ang nag-apply kag kami bilang incoming fourth year students, nagpila gid agud mag-apply sa amon tagsa ka barangay. Nagsumiter sang mga kinahanglanon nga mga papeles, nagpa-interview kag nagalaum nag mapilian kag mangin skolar kag ang amon ginapanumdum nga ang 20K dako nga bulig kag sabat sang amon handum nga makatapos sang amon pagtu-on.
Ini nga kantidad makabulig sa amon pang gastos sa OJT, school supplies, kag iban pa nga balayran sa eskwelahan, labi nagid sa balayran sang boarding house kag plete.
Apang natapos lang ang pagbaton sang mga aplikante, wala gid sang may nakasulod sa amon. Ang amon pamangkot ginsunod guid man bala ayhan sang evaluation team and ang guidelines nga ginahambal sang amo nga programa? Ukon basi palapit lapit nalang sa luwag ang ila gin- obra? Ukon basi mga konektado nalang sa barangay opisyales ang gina paboran nila?
Kon amo malang sina ang nagkalatabo tani mas maayo pa nga ginpanghatag nalang sa tanan mga estudyante nga naga-apply para wala sang duda. Kay bisan gamay lang nga kantidad patas ang tanan. Wala sang ginapaboran.
Ang amon P20K nga ginahandum, wala na sang paglaum!
