Sang damlag lang naghambal si DTI Secretary Christina Roque nga ang Php500 pwede na panghanda sa Noche Buena sang isa ka pamilya. Sa Php500 mo makabakal kana kuno sang Christmas Ham nga tig Php170, Spaghetti Noodles Php30, Spaghetti Sauce Php48.50, Macaroni noodles Php40.95, Mayonnaise Php55, Cheese Php56.50, Fruit cocktail Php61.75, All pupose cream Php36.50. Kon tatalon mo ina tanan Php499.20 Pesos may bilin ka pa nga Php0.80 sintimos.
Kon kamo ang pamangkoton, mapaigo ninyo ayhan ang Php500? Kon ako indi gid kay syempre una magpanidahan ka diri sa Roxas City sa lipunan, plete mo sa tricycle P50.00 na back and forth. Hay mabakal ka pa Mantika, Sibuyas, Bawang, giniling nga baboy para lupos mo sa spaghetti, kon spaghetti imo lutu-on. Baklan pa ina sang evaporated milk, hay kon gusto mo pagid magnami baklan mo pa ina sang hotdogs. Sa Sapaghetti palang paano na kaigo ang 500 mo? Alangan naman indi mo pag gisahon kag pagbutangan sang lupos? Sin-o man maka-on sang Spaghetti mo kon kalain ang sabor?
Ang Christmas Ham tig Php650 bala ina 1 pack nga 1 kilo Good meat iya brand. Basi ang buot silingon ni DTI Sec. Roque nga ham nga tag 170 inang manipis nga sini-ad kay pwede ka kabakal sang tingi-tingi.
Sa Macaroni Salad naman, Ang imo sina bala panakot kulang na ina ang 500 ya. Maluwas nga mabakal ka Macaroni mo, panakot mo pa, pareho man na kon maluto ka spaghetti, kinahanglan manami man imo luto agud makaon.
Apang may ara man nagahambal nga pwede na ang Php500 sa Noche Buena. Depende ina kon ano imo lutu-on. Pwede ka magluto sang Pork Barbecue, Bakal ka 1 Kilo nga Pork Belly tig P380 kag kag bawang P10, Tuyo P10, Calamansi P10, barbecue stick 25, Asin 10, betsin 5 kag Uling 50, total is 500. Imagine mo lang nga ham kag litson imo naka-on, kay baboy man na dyapon.
Ngaman kon wala ka handa sa Noche Buena indi madayon ang paskuwa? May handa ka kag sa wala madayon gid ina! Tungod ang pagselebrar naton sang paskwa simbolo sang kalipay sa pag-abot sang anak sang Dios nga si Jesucristo, ang aton manunubos sang aton mga sala. Ginaselebrar pagid naton ini tungod sa pagsalamat sa mga grasya nga aton nabaton halin sa Gino-o kag ginaselebrar man naton ini agud ipabatyag ang aton paghigugma sa tagsa-tagsa.
