Naglab-ot sa 1,782 ka mga Family Food Packs nga nagabalor P991,356 ang ginpanagtag sang Department of Social Welfare and Development (DSWD) sa Western Visayas para sa mga Capiceño nga naapektuhan sang habagat kag mga bagyo.
Suno sa Disaster Response Operations Monitoring and Information Center (DROMIC), kapin 4,894 ka pamilya ukon 24,374 ka indibidwal sa 26 ka barangay sa mga banwa sang Sigma, Panay, kag Maayon ang naapektohan sang malain nga panahon.
Nahibaluan nga sa nauna nga report sang DSWD, may 33 ka pamilya ukon 154 ka individual sa Capiz nga na-displace kag napilitan nga magpangita sang mas luwas nga lugar sa gwa sang mga evacuation centers tungod sang padayon nga ulan kag pagtaas sang tubig.
Ginpahayag sang abogada nga si Sheila Artillero, Provincial Disaster Risk Reduction and Management Officer sa Capiz, sa Kapihan program sang Philippine Information Agency, nga ang bagyo Crising kag Habagat ang nakaapekto lang sang mga uma nga ginatanuman sang humay sa probinsya sang nagligad nga semana.
Ginpahayag man niya nga antes pa nag-abot ang malain nga panahon, ang lokal nga panguluhan sang probinsya ang nakapanagtag na sang 8,000 ka food packs nga may unod nga bugas, de lata kag noodles sa mga mangingisda sa Roxas City kag sa tanan nga coastal municipalities sang probinsya.
Ang distribusyon ang ginpatigayon sang “Task Force Pagdumdom” nga gin-organisa sang probinsyal nga gobyerno halin sa mga frontline departments sini kag may katungdanan nga siguruhon ang kahimtangan sang mga Capiceño sa tion sang kalamidad kag iban pa nga emerhensya. (Alex Lumaque/PIA Capiz)
