Gugma ukon kwarta?
Diri sa Capiz masadya ang election. Feeling sang mga tawo, daw paskwa kag fiesta. Puno ang mga kalan-an, malaba ang pila sa mga groceries kag appliances stores. Bisan diin lang—hasta litsonan, gaka-ubusan! Hambal pa gid sang manug-balot, dasig naubos ang ila baligya.
Pati mga tricycle drayber, malaka kaayo ang pag-biyahe sunod nga adlaw pag tapos election. Na abutan gani kami 1 ka oras pag bantay! Nag pa huway-huway kuno mga drayber!
Daw first time ini natabo sa Capiz nga muni kadako ang pag-panagtag sang mga politiko!
Sa Roxas City, may nakabaton sang tig P6,200 kag may naka baton sang tig P4,000.
Sa iban nga mga banwa, may nakabaton sang tig P5,000, may ara tig P3,000, may ara tig P2,900.
Sa muna kadalagko nga kwarta, ano sa banta ninyo? Amo gid man ayhan ang nag-padaog sa mga iban nga kandidato?
Nabal-an naman sang tanan nga ang Premiero Distrito gid ang gin bantayan!
Wala gid nag-panumdum ang kalabanan nga ma-perdi ni Congressman Howard Guintu si Paolo Roxas, ang anak ni anay senator kag DILG secretary Mar Roxas.
Kay kon pumuluyo ka sang Roxas City, buot silingon: Ila guid tani si Paolo. Gin-pangalan gani sa lolo ni Paolo ang Roxas City.
Sin-o naman ya si Howard Guintu? Kon imo sundan, Andrada ang pamilya sang nanay ni Guintu. Tumadok man sang Roxas City ang mga Andrada.
Sa Roxas City lang ang daku nga pag-suporta kay Paolo! Guin pamatud-an gid ni Mayor Ronnie Dadivas nga maka-abanse sang 10,000 ka boto si Paolo!
Kon ano ka-palangga sang mga Roxasnon si Paolo, baliskad naman sa mga kabanwahanan sang Premiero Distrito. Palangga sang mga pumuluyo sa kabanwahanan si Guintu.
Ano ang rason na perdi si Paolo? Nag pili man gid ayhan ang pumuluyo?
Ano ayhan ang nakita sang pumuluyo kay Guintu nga wala kay Paolo?
May vote buying man gid bala?
Kay sa report sang aton police, wala gid sang may nabalhag nga vote buying sa probinsya.
Panginbulahan nalang sa mga nagdala-og!
Sa wala nagdaog, may sunod pa nga election ah! Pwede pa kamo kadalagan liwat sa tuig 2028.
