Siyudad sang Roxas—Gina-question sa karon ni Mayor Ronnie Dadivas ang pagpanaog sang show cause order sa iya ni Gov. Nonoy Contreras kay suno sa iya nga ang ginbutang kuno didto nga provision wala nagasanto.
Suno kay Dadivas, ngaa man papanaugan sya sang show cause order ni Contreras kay wala ini sang awtoridad nga magpapanaog sang nahinambitan nga order sa iya?
Dapat kuno ang Presidente lang kag ang alter ego sini nga Department of Interior and Local Government (DILG) ang dapat ang mag disiplina sa ila nga mga mayor kaupod na siya nga mayor sang component city.
Apang ginsabat man ini ni Governor Contreras nga wala sya ya kuno naga disiplina kay Mayor Dadivas kundi ma-file man lang sya kuno sang kaso nga administratibo kon nakita niya nga may sala ang mayor sa iya sini nga duties and functions.
Ginapanindugan pa ni Contreras nga ang pagpapanaog niya sang show cause order sandig sa layi bilang isa ka chief executive sang probinsya.
Sin-o gid bala ang dapat masunod? May awtoridad gid man ayhan ang gobernador nga magpapanaog sang order? Ukon dapat gid man ayhan papanaugan sina si Mayor Dadivas?
Kon nagahinyo man lang si Mayor Dadivas sa Inter-Agency Task Force (IATF) nga mag time-out anay sa pagbaton sang mga Locally Stranded Individuals (LSI) sa Roxas City, siguro may rason man ini kay syempre tungod indi siya gusto nga magdinamo sang kaso sang Covid-19 sa iya nasakupan.
Ginapakigbato naman ni Contreras nga makaluluoy ang mga LSI didto sa Batangas Port nga nagahigda na lang sa higad sang karsada gamit ang karton nga nagasirbe nga banig nila nga luyag magpauli diri sa ila tagsa ka pamilya sa Capiz—muna nga gusto niya magbaton sa gihapon sang pagdungka sang mga barko diri sa Culasi Port sa siyudad.
Pareho man sila nga duha may mga rason! Pero siguro magatawhay sila kon ang ila rason isahon na lang nila. Kinahanglan guro magpangape nanday Contreras kag Dadivas agud maistoryahan sang maayo kon ano gid bala ang himuon.
Kon para man lang sa kaayuhan sang mga taga-Roxas City kag probinsya sang Capiz, magbinuligay na lang guro, ah!
