Sin-o ang labi sa imo: Nobya ukon pamilya?

Kita nga mga Pilipino, ginakilala nga mabaskog ang relasyon sang pamilya. Ang mga bata bisan
may pamilya na, yara gihapon sa bobong sang ila ginikanan. May ara man nga bisan may
pamilya na, sa gihapon nagabulig sa ila ginikanan kag kautoran.
Pero ang masakit, kon ang isa ka tao, ginabaliwala ang iya pamilya kon maka-asawa sing dalok
kag indi gusto magbulig sa pamilya sang iya asawa o bana.
Katulad sang nabalahuba sa social media ang tuhoy sa indi paghangpanay ni Carlos Yulo kag
sang iya ginikanan. Nga sang wala pa sya naka nobya, importante sa iya ang iya ginikanan kag
pamilya.
Pero sang magnobya sia, gulpi nagkambyo ang huyop sang iya ugali. Gina-isipan na niya ang iya
ginikanan kag nagapakita nga kontrolado siya sang iya nobya. Gani madamo ang nagayubit sa
iya sa social media.
Apang ini nga senaryo gulpi natabonan sang maglapnag sa social media ang kasaysayan sang
kabuhi sang sarhento nga pulis sa Manila nga si Julius Manalo. Sa sulod sang 31 anyos, iya
ginpangita ang iya iloy.
Wala niya ginhatagan pagtamod kon ngaa wala sia sa tupad nya ang iya iloy sugod anum ka tuig
ang iya edad. Ang nagapangibabaw sa iya balatyagon amo nga makita kag mahakos ang iya iloy.
Sang magkitaay pagkaligad 31 anyos, wala nya siya magsukmat sa iya kon ngaa
ginpatumbayaan siya. Ang nagapangibabaw sa iya pag huna-huna kag balatyagon amo nga
magkitaay sila sang iya iloy. Iya ginkalimtan ang kakulangan sang iya iloy sa iya. Ang
importante: nagkitaay sila kag sa ulihi maga-updanay sa isa ka bobong.
Luwas sina, wala man siya nagapalta sa paghatag sing bulig sa iya amay kada bulan. Diri makita
sa isa ka tao, nga ang labi sa iya balatyagon amo ang pamilya. Pila ayhan sa aton ang may
subong sini nga panimoot?