Naga-total sa sobra P1.4 million ang nakuha sa separar nga drug raids sang kapulisan sa mga kabarangayan sang Banica kag Punta Tabuc sa siyudad sang Roxas kagaina (Hulyo 1, 2025) sang aga.
BANICA RAID
P1,292,000 nga estimated street value sang ginasuspetsa nga shabu ang nakuha kay alyas “Cobra” kagaina nga 7:21 a.m. sa Brgy. Banica, Roxas City.
190 grams ang nakuha nga suspected shabu sa nasambit nga drug bust.
Ang nasambit nga droga nakasulod sa 38 ka heat-sealed transparent plastic sachets.
Nakuha man sa raid ang lima ka piraso sang wala nagamit nga caliber .45 ammunition, isa ka caliber .38 unfired ammunition, isa ka caliber .357 fired cartridge, kag isa ka selpon. May iban pa gid nga nakuha sa raid pero hindi na kunektado sa paghimo sang ginaalegar nga krimen.
Nagsanib pwersa ang Capiz Provincial Provincial Drug Enforcement Unit (PPDEU), Philippine Drug Enforcement Agency 6(PDEA), kag 1st Capiz Provincial Mobile Force Company (PMFC) nga may supervision ni Capiz Police Provincial Office director Police Colonel Albert D. Tapulao.
PUNTA TABUC RAID
Sang 10:33 a.m. kagaina, P204,000 nga balor sang shabu ang nakuha sa isa pa gid nga drug raid sa Punta Tabuc, Roxas City.
Nadakpan ang street-level individual sa ila panimalay sa Punta Tabuc nga may ginaalegar nga 30 gramos sang shabu nga nakasulod sa pito ka transparent plastic sachet.
Pareho nga nasa Roxas Component City Police Station ang duha ka suspek as of press time.
Nagbuligay ang Roxas City Drug Enforcement Unit, Capiz Provincial Drug Enforcement Unit (PPDEU), kag ang Philippine Drug Enforcement Agency (PDEA) Capiz nga may supervision halin kay Tapulao,
(Mga laragway halin sa Capiz Police Provincial Office)
