Daw ga libog man akon ulo kon ano ini sila nga grupo? Ang akon lang naintihinan diri, ang PTA! Amo ini ang Parents-Teachers Association sang eskwelahan. Apang ngaman may nag dugang-dugang na?
May isa ka nanay nagpa-abot sang mensahe sa akon. Suno sa iya, gina sukot sila sang tig 100 pesos para sa ila kabataan, alamutan kuno sa ila PTA sa sulod sang isa katu-ig. Suno sa iya, naintindihan man nila ini nga may balayran apang indi sila makabayad insigida kay ginatipun-tipunan pa nila.
Pero grabi mag pilit kuno si SPTA President sa mga teacher representatives kag advisers nga adlawan ang pag-panukot sa kada section. Ngaman bay? Ano nasaku-an ni Mr. SPTA President haw?
Ang SPTA amo gali, amo ini ang grupo sang kabilugan nga mga officers sang School Parents-Teachers Association.
Sang damlag lang, may gindihon sila nga resolution sa eskwelahan nga naga hinyo nga mag tukod sang Materials Recovery Facility (MRF). Manami gid ang tinutuyo kay para ma-mentinar ang katinlo sang palibot sang eskwelahan kag kinahanglan nga may insakto nga pagkuha kag pag pa-in sang mga basura halin sa mga hulot sang eskwelahan.
Sa ila resolution, wala nakabutang kon pila ang magasto sini nga proyekto. Apang kon imo pamangkoton ang mga barangay nga may yara MRF, nagalab-ot sa 300-500 thousand pesos ang magastos.
Hay, diin kamo makuha sang igasto diri? Kay sigurado nga wala ini nadala sa budget sang isa ka eskwelahan.
Manami gid ini nga proyekto. Pero kon halin ang kwarta sa mga kabataan, kalu-oy man ang mga ginikanan. Ka-mahal pa nga daan yanda sang tanan, dugangan pa sang alamutan para sa MRF.
Mr. SPTA President, bati-bati ko gina binaligya mo da kuno asta ang Car Pass.
Sir Principal, ano ka matu-od ini?
Ngaman daw kadamo sang mga gina-tukod nga mga grupo dira sa imo eskwelahan? Suno sa nagpadala sang mensahe sa akon, ang HPTA naman nga grupo iya ina sang year level kag ang PTA naman iya sang room lang. Daw galingin man akon ulo ko ah!
Sir Principal, may iban pa da nga grupo ayhan nga wala pa na lista sang inyo eskwelahan?
