Roxas City — Ginapangabay ni Capiz Vice Governor James “Mitang” Magbanua sa tagsa ka mga pumuluyo sang probinsiya nga maghiliusa kag mag binuligay labi na gid karon nga panahon sang krisis.
Sa iya mensahe sa ginhiwat nga ika-27th Provincial Cooperative Month, iya ginahatagan sang importansiya ang leksiyon nga dapat matun-an sang tagsa-tagsa—amo ang kooperasyon labi na gid karon nga nagapangatubangang pungsod sang isa sa pinakadako nga krisis ang Covid-19.
“Cooperation does not only involve little things, but also a life changing actions to meet people mutual needs—and that is the meaning of cooperative,” pahayag sang bise gobernador.
Nangin importante man ang pag-saulog sang cooperative month sa bulan sang Oktubre bangud isa sa mga importante nga tikang ang pagpasanyog sang sector sang kooperatiba agud mabuligan ang mga trabahador labi na gid sa sektor sang agrikultura agud makabangon sa nangin epekto sang Covid-19, suno kay Magbanua.
Dako nga porsyento sang palangabuhian sang mga pumuluyo sa probinsiya sang Capiz amo ang pagpanguma kag pagpangisda nga labi naapektuhan sang krisis. Pero sa bulig sang kooperatiba, dako ang posibilidad nga makabangon gilayon ang mga ini, suno kay Magbanua.
Dugang pa ni Magbanua,“alagyan kita sang bagyo, apektado kita kung may baha, linog kag kung ano pa man nga mga man-made kag natural nga mga kalamidad. Kagnahibaluan naman naton masami sa sini nga panahon ang numero uno nga apektado amo ang aton mga mangunguma kagmangingisda kag mga pigado nga mga pumuluyo.”
Samtang, nag turnover naman si Mgabanua sang mga monoblock chairs sa Dao National High School bilang kabahin sang iya programa nga mabuligan ang mga lugar nga nagakinahanglan sang mga pulungkuan.
Una na nga naghatag sang mga monoblock chairs ang bise gobernador sa Barangay Lanot, Pagbunitan, Sigma, Dulangan, Pilar kag Culajao Roxas City.
Kadungan man sini ang pagpanagtag sang mga libro gikan sa bulig ni Ako Bisaya party-list Representative Sonny Lagon.
Ang nakabaton sang mga donasyon nga libro amo ang Dao National High School Kag Dao Elementary School.
Ang nasambit nga programa ang may tema nga “Regalo ko nga Libro, Giya sa buwas damlag mo, Dugang nga kalam para sa imo kadalag-an.”
Ginpangunahan man ni Magbanua kaupod nanday Roxas City Mayor Ronnie Dadivas kag Board Member Thea Faith Reyes ang pag turnover sang mga medical facilities sa The Health Centrum.
Isa ka unit nga Fisher and Paykel High Flow Nasal Cannula (HFNC) kag mga accessories gikan sa New Zealand ang ginbaton sang nasambit nga ospital sa pagpangunani Dr. Abundio Balgos.
Gikan ang donasyon kanday Atty. Blas James Viterbo, Dr. Maritess Gozon-Viterbo kag Carabineros Development, Inc..
Ang HFNC ang pinaka-una nga non-invasive respiratory support system sa probinsiya sang Capiz nga magamit sang mga Covid-19 patients kag mga high-risks respiratory case patients.*
