‘Wala sala sa pagbaligya sang ginremata nga cellphone’ –FMB Pawnshop

Siyudad sang Roxas—Nagpanindugan ang pamunuan sang FMB Pawnshop diri nga wala sila sang sala pagbaligya sa iban sang ila ginremata nga daan nga model sang Vivo cellphone ni Romeo Bolina.

Suno kay Mila Bautista, nga dismayado ini sang nabatian sa isa ka radio station ang reklamo sang nagprenda sang amo nga cellphone.

Ginprenda ni Romeo Bolina ang iya cellphone sa amo nga pawnshop sang March 9, 2020 kag nag-expire ini sang April 9, 2020. Gin-appraise ini sang ila staff sa kantidad nga naglab-ot sa eight hundred pesos (P800).

Suno pa kay Bautista nga sang ginpaidalum ang Roxas City sa Enhanced Community Quarantine (ECQ) sang March 20, 2020, temporaryo sila nga nagsarado tungod nahadlok sila mag-atubang face-to-face sa ila mga kliyente tungod sang Corona Virus.

Pero suno sa iya, apisar napaidalum sa ECQ indi sila pwede magsara totally kay tungod may money remittances sila.

May mga nagakadto kuno sa gihapon sa ila opisina agud magpadala kag magkuha sang kwarta, muna nga isa lang ka pertahan sang pawnshop ang ila gin-abrihan kay para kon may mga costumer pwede kapanuktok kag katawag.

Sang April 1, 2020 sang ginpaidalum ang aton siyudad sa General Community Quarantine, nagbalik man kuno dayon ang normal operation nila. Gin-abrihan na nila ang duha ka pertahan sang pawnshop.

Tungod April 9 pa man kuno ang due date sang ginprenda nga cellphone ni Bolina tani pag-abot sang sina nga adlaw nag-agi man siya sa FMB Pawnshop kay makita man nga abri na kag kon waay pa siya sang inugbayad, pwede man ma-renew, baylohan sang panibag-o nga resibo.

Suno ki Lerna Togonon, empleyado sang nahinambitan nga pawnshop kag amo ang nag-issue sang resibo kay Bolina, pagprenda sini nga may tatak kuno nga “AFTER DUE DATE NO EXTENSION” nga nakabutang sa ibabaw nayon sa wala nga bahin sang resibo.

Kon naghapit lang kon tani si Bolina sa pawnshop antis ang June 15, 2020 sang pag auction sale nila sang cellphone kag iban pa nga mga rematado nila tani makonsiderar pa. Apang wala man kuno nakahapit ukon nakatawag man lang sa ila si Bolina.

Gindugang pa ni Mila Bautista, ang tag-iya sang FMB Pawnshop, nga gindesisyunan niya nga ipa-auction sale ato nga cellphone sa balor nga one thousand three hundred pesos (P1,300) kay madugay na kag nahadlok siya nga mamalayran pa kon masamad sa iya nga shop kay madamo na ang iya na-experience nga namalayran siya kay paggawad indi na mag-andar kay nag “stuck up” na.

Indi naman sya magpati nga seven thousand pesos (P7,000) ang value satong cellphone ni Bolina suno sa ginahambal sini sa isa ka radio station. Kay kon 7,000 pesos ang value sato, dapat tani five thousand pesos (P5,000) ang ila appraisal pagprenda kuno sato.