Sunod-sunod nga bomb threats ang nabaton sang mga buluthuan sa Capiz, halin sa Ivisan NHS, Dao NHS, Sapian NHS, tubtob sa CapSU Dumarao.
Tungod sini, apektado ang mga klase kag nagdala man ini sang kakugmat kag kahadlok. Para sa kadam-an, ila ini ginatan-aw nga joke ukon prank. Sa baylo nangin magarot ang Capiz tungod sa mga pamahog nga wala ginalauman. Ang mga estudyante, manunudlo, kag ginikanan indi mapahamtang kun ila mabatian ang singgitan sang mga administrasyon sang eskwelahan nga “Evacuate the campus immediately”
Suno sa Capiz Police Provincial Office (PPO), wala pa sang may nakit-an nga aktuwal nga bomba, apang indi buot silingon nga wala na sang problema. Ang isa ka tawo nga mapamatud-an nga naghimo sini, ang mahimo nga mapreso sang lima ka tuig kag magabayad sang Php 40,000 nga penalidad. Indi lang ini simple nga sala, kundi krimen nga nagapeligro sa kabuhi sang tawo kag nagadula sang kalinong sang komunidad.
Ang epekto sang amo nga hinimuan indi lang sa eskwelahan kundi sa bug-os nga komunidad. Ang mga estudyante nagaka-stress, ang mga ginikanan naga-pangduha-duha ukon naga-overthink sa kahimtangan sang ila mga kabataan sa eskwelahan, kag ang mga otoridad naga-trabaho gid para masiguro nga ang may sala mapanabat kag mahatagan sang hustisya.
Ang PNP kag NBI cybercrime division naga-imbestigar na, kag indi naton gusto nga ang kabuhi sang tawo mangin eksperimento lang sang pipila ka mga indibidwal nga wala nagapaminsar sang epekto sang ila ginahimo. Kinahanglan gid nga may seryoso nga aksyon kag solusyon. Ang mga eskwelahan kag komunidad dapat magpahibalo sa tanan parte sa legal consequences kag responsibilidad sang tagsa ka tawo nga nagasupak sa kasuguan
Ang boredom, curiosity, ukon gusto lang mag-prank indi rason para i-risgo ang kabuhi sang iban. Ang bomb threat indi chika-chika lang.
Ang seguridad kag kabuhi sang kada isa dapat pirmi una sa tanan. Kinahanglan may responsibilidad, disiplina, kag respeto sa isigkatawo. Ang kabuhi sang tawo indi eksperimento, indi subject sa uso ukon kaladlawan. Gani ang proteksyon kag seguridad sang tanan, mangin labaw sa tagsa ka tion.
