Community pantry, para kay sin-o ini?

Bilang isa ka Pilipino kultura naton diri sa Pilipinas ang mangin mabinuligon sa aton ginikanan, kauturan kaparyentehan, mga kilala kag mga amiga ukon amigo.


Ang iban gani nga pamilya indi makakaon kon indi sila mag-ilos sang ila sud-an sa kalapit nila nga balay. Bisan ang aton gani nga mga bayo nga manami kon hulamon sa aton ginapahulam man naton.
Sang nag-umpisa lapnag ang Covid-19 diri sa aton nasyon, apektado gid ang tanan umpisa sa pangabuy-aynan, negosyo, trabaho kag madamo pa. Kag halos indi na masarangan sang aton gobyerno kon paano nila awayon ang dulot sang kapigaduhon.

Sa sini nga situwasyon, diri sa Capiz umpisa sang naglock-down sang nagligad nga tuig, madamo na sang pama-agi ang gobyerno lokal diri. Kanya-kanyang style. Sa Roxas City si Mayor Ronnie Dadivas wala untat ang paghatag sang ayuda nga bugas sa mga pumulyo. Si Governor Nonoy Contreras naman vitamins kag face mask. Bisan ano nalang nga pamaagi basta makabulig sa pumuluyo sang Capiz.

Maluwas sa local government unit diri, may mga gupo pagid nga gusto man maghatag sang ila nga bulig. Pareho satong grupo sang Capiznon Barter Community. Ang ila sato sistema nga kon may mga gamit ka sa inyo balay nga wala malang ginagamit kag imo na inughaboy, pwede mo pa mapuslan. Ipost mo lang sa ila page kag pwede mo mabaylohan sang imo gusto. Pwede groceries, tanum, gamit sang bata, bisan ano lang. Basta wala cash nga involved. Pwede gani pati ila balay, salakyan baylo mo bugas.

Pagkatapos sang Barterananay, nagsunod naman dayon ang Buligay Kita. Ang sistema naman diri pwede ka maghatag bulig ukon magpangayo sang bulig. Pero daw wala ini nagsikat pareho satong barter kay siguro mas damo ang nagapangayo sang bulig kaysa nagahatag sang bulig.

Subong ari naman ang Community Pantry. Ang istelo naman diri nga makuha ka sang kinahanglanon mo nga libre kag maghatag ka sang masarangan mo. Daw balikan mo tani ang ginkuha mo. Pero kon wala ka man sang ibalik ok lang kay tungod indi ka man kasarang.

Madamo na ang akon nakita nga may Community Pantry, isa na dira ang sa Magallanes Street, Brgy. 1, Roxas City. Umpisa sang Lunes, April 19, pagbutang palang sang lamesa sang mga itlog, utanon, sardinas kag iban pa, gindugukan dayon insigida sang mga tawo.*