Pa-sakam ukon scam?

ROXAS CITY – Pay-out kana? Hulat-hulat lang anay, salig lang ta ah! Amo ini permi ang masami ko nga mabati-an kon nagapangape ako sa mga pila ka kapehan diri.

Tungod nauso diri ang investment double your money scheme sa Capiz, daw halos tanan nga Capiznon nabutang karon sa alang-alang kon ayhan mabawi pa ang ila kwarta nga ginhatag didto sa isa ka investment scheme.

Akon natandaan, December 2019 pa nag-umpisa ining Chiyuto Creative Wealth Document Facilitation Services ukon Chiyuto double your money scheme.

Nag umpisa ini pinaagi sa isa ka gamay nga pagtililipon sang nag abot ini si Patroceno Chiyuto Jr. nga tumandok sang Capiz. Ginptawag sini iya mga pamilya, classmates kag mga amigos ka amiga agud organisahon ang iya plano nga magpatindog sang negosyo nga double your money investment scheme agud suno sa iya nga makabulig sa mga pigado nga Capizeno.

Pagkatapos sato nga pagtililipon naglapta na dayon ang estorya nga may Chiyuto investment nga kon invest ka nagadoble imo kwarta.

Tungod nagdugok na diri ang mga tawo kag indi masarangan ang pagkadto sang tawo kada adlaw nagkuha na ini si Chiyuto sang ginatawag niya nga upline para sila na ang magbaton sang kwarta halin sa mga tawo nga gintawag naman nila nga mga downlines (investors).

Kon gusto mag invest ihatag mo imo kwarta sa upline, sila na ang mapila para mapasulod ang imo kwarta, kag maghulat ka nalang sang pay out mo sa sulod sang 30 days, 45 days ukon kis-a 60 days nga doble. Syempre tungod nagakabudlay man ining mga uplines ginahatagan sila ni Chiyuto sang 5 percent nga commission sa total of money nga ila napasulod.

Masobra man isa ka-tuig umpisa sang gintukod ini nga investment scheme ni Patrocenio Chiyuto Jr. ukon mas kilala nga Doc Don Chiyuto kag Don Zhang Lee Chiyuto kag maasig ini nga naglapta indi lang diri sa Capiz kundi sa bug-os nga Pilipinas pati na ang mga OFWs naingganyo kay nagapanumdum nga magdoble ang ila kwarta sa sulod lang sang 30 days, 45 days ukon 60 days.

Natuman gid man ni Chiyuto ang iya pangako sa mga tawo nga ibalik doble ang ila kwarta kag nagapanghatag man ini sya sang bulig sa mga kubos nga mga pumuluyo pina-agi sa pagpanghatag sang bugas kag kwarta.

Madamo ang nalipay ilabi nagid sang mga nauna nagsulod diri kag ang mga may ara kwarta kag dalagko ang mga gin-invest. May mga nagatestimonya gani nga tungod lang kay Chiyuto nakabal sila sang mga salakyan, balay kag duta.

Apang sang January 12, 2021 nakibot ang tanan sang nagpost ini si Chiyuto sa iya Facebook page nga ma-holiday kuno anay siya. Buot silingon wala sang pay-in (ipasulod nga kwarta) kag wala man sang pay-out (ipa-gwa nga kwarta) nga matabo.

Hasta naglab-ot na sa masobra tunga sa bulan (1/2 month) nga wala sa gihapon sang transaction ang opisina apang sa gihapon nagasalig ang mga nag invest nga ibalik ang ila nga kwarta.

Umpisa sang nagholiday si Chiyuto, didto man nag-guluwa ang mga iban pagid nga double your money kag triple your money investment scheme. Grabe man ang pang ingganyo sini nila nga madoble ukon ma triply ang imo kwarta sa sulod lamang sang 25 days, 15 days, 7 days kag 1 day.

May ara pagid nga Cash Drop nga sa online lang ang transaction. May iban man nga nakakuha apang mas madamo ang wala nakakuha hasta subong kay tungod nadula na ining mga investment sheme nga ini. Indi mo na gani mabal-an kon diin na sila?

Sang January 31, 2020 may bag-o naman nga nadakpan sa entrapment operation sang Roxas City PNP nga lain naman ila style sang pagpanghaylo.

Apisar nga double your money investment scheme man gihapon pero indi kwarta ang ibalik sa imo kundi salakyan nga Montero SUV kon makapasulod ka sa ila sang 2.5 million.

Sang mga nagligad nga tuig sang mga 2017 mag kasubong man sini nga nagkalatabo diri sa Capiz. Kon aton matanda-an atong Forex Scam nga gintukod ni Lourdes Baarde kag atong Doc Betita Airbit Club nga gintukod ni Dr. Ricardo Betita.

Pareho gid ang style kag ang diskarte, indi gani ato sang doble pero damo man sa gihapon sato ang nahaylo.

Hasta subong wala pa nabalik ang mga kwarta sato sang mga investor hasta napreso nalang si Baarde kag hasta subong.

Natingala gid ako sa mga Capizeno, ngaa man daw wala kita kadudlaan haw? Kon aton panumdumon diin makuha ining mga investment scheme sang kwarta agud i-doble ukon i-triple nagid sang aton mismo kaugalingon nga kwarta?

Ginpasakam lang kamo gali kita nila. So karon, indi na naton maintindihan kon ayhan ibalik pa nila ang aton mga kwarta ukon indi kay sagi lang tinug-an nga hulat lang, salig lang. Ang pamangko tub-tob san-o kita maghulat kag magsalig? Daw ang pakadtuan sini scam naman?*