Paalam sa imo Nong John…

Nakibot ang tanan nga kakilala, himata, mga abyan kag pamilya sang Municipal Administator sang Pilar nga si John Heredia sadtong Mayo 2, sang hapon kag ginpatay ini sang 2-ka wala makilala nga mga tawo nga nagasakay sa motorsiklo samtang nagapamalaklon ini sa isa ka hardware diri sa Brgy. Lawaan, Roxas City.

Ginhingagaw pa kon tani siya dala sa ospital apang nagahilibi-on nga ginkompirmar sang iya asawa nga si Atty.
Criselda Heredia nga dead on arrival na ini pag abot sa ospital.

Si John Heredia ukon ginatawag ko siya nga Nong John, una ko nabatian ang iya pangalan sang nagsulod ako sa
Capiz Times, tuig 1998. Matunog ang iya pangalan tungod sang iya didikasyon bilang is aka aktibo nga katapo sang media indi lang diri sa Capiz kundi sa bug-os nga Region 6.

Siya nangin aktibo nga manunulat sa mga peryodiko pareho sang The Capiz Times kag Panay News. Maluwas sina
nagpundar man ini sang iya TV program nga may tig-ulo nga “Abri-Aga” kon sa diin aton matan-aw sa aga kag hapon sa local able diri. Isa man sya ka composer/singer kag artist.

Sang nagsulod na siya sa pagserbisyo sa gobyerno bilang isa ka municipal administrator sa Pilar, apisar nga indi na siya
sang aktibo bilang isa ka media practitioner apang mabatyagan ko nga ang iya taguipusu-on yara sa gihapon sa amon.

Indi ko maintindihan ngaman? Kon diin pa ang mabuot nga tawo amo ang ginakuha sining mga tawo nga wala sang taguipusu-on kag mga wala sang konsensya.

Sa karon wala pagid sang kongkreto nga ebidensya nga mapakita ang mga katapo sang mga pulis sa pamilya Heredia.
Kag kabay pa nga maangkon sang pamilya ang nagakadapat nga hustisya kag indi lang kon tani mangin ningas kugon angimbistigasyon.*