Plano Pa Lang Bala Ukon Maabot Na?

Roxas City—Lima na ka bulan sang ginpaidalum ang probinsiya sang Capiz sa lockdown tungod sang Corona Virus Disease 2019 (Covid-19).

Ano ayhan ang mga natapos na mga plano sang aton gobyerno sa bug-os nga probinsya?

Sang March 24, 2020, amo ang pinakauna nga may kaso kita sang Covid-19 diri sa Capiz.

Insigida sato nagpatawag meeting si Governor Nonoy Contreras kaupod ang mga katapo sang Provincial Inter Agency Task Force (IATF) kag ginplanuhan kon ano ang masunod nila nga obrahon agud indi magdamo ang kaso sang Covid-19 diri sa aton.

Sunod-sunod nga meeting pirmi ang ginapatawag, sari-sari nga venue, sari-sari ang plano kag madamo nga mga rekomendasyon ang mga nadihon didto.

Hasta sang nagpagwa sang order ang national IATF nga nagasugo nga isara ang mga border sang tagsa ka probinsya. Kag diri nakita ta nga maayo gid man ang pagplano sa pagbantay sang aton mga border kay nabantayan nila nga wala kita nasudlan sang madamo nga kaso sang Covid-19.

Sang nagdugang na ang kaso naton diri, nag tatlo na, didto naalarma ang mga mayor sa tagsa ka Municipyo.

Gilayon nga naghinyo dayon ang presidente sang League of the Municipalities of the Philippines Capiz Chapter nga si Mambusao mayor Leodegario Labao Jr. nga magsinapol kaupod ang gobernador, mga katapo sang IATF kag mga mayor sa bug-os nga probinsiya agud hinalaan kon ano ang himuon para indi maglapta sa bug-os nga probinsya ang virus.

Suno sa gin-istoryahan sato nga pagsinapol, ginrekomendar sang mga mayors sang 16-ka banwa nga dapat ang probinsiya mag obra sang ila mismo nga quantine facility diri sa Roxas City.

Agud suno sa ila malapit sa tanan, pareho sang hospital kag sa mga doctors kag nurses nga maga atipan sa nagaquarantine kag madali bantayan ang exit kag entrance., ginplanohan nga ang Capiz National High School (CNHS) amo ang obrahon kon tani sang probinsya nga quarantine facility.

Apang wala sato nagsugot ang city government kay suno man kay Mayor Ronnie Dadivas ginkonsulta niya ang mga pumuluyo kon sa diin nahamtang ang CNHS apang lunsay nagapamatok ang mga ini. Kag si Governor Contreras wala man sato mahimo tungod indi magpasugot ang siyudad.

Tungod wala ato nadayon ang CNHS, nagpagwa sang Executive Order si Governor para sa mga mayor nga ipasa nalang sa mga munisipyo ang pag-quarantine sang ila mga pumuluyo.

Buot silingon masig-obra na lang sila sang ila quarantine facilty hasta sa mga kabaranggayan sa bug-os nga probinsya.

Kundi nag-inobra man sila eh! May mga quarantine facility nga bongga, may air-con, internet kag TV pero may iban man nga simple lang, katre lang, habol kag unlan ang sulod. Basta ang importante may ara sila facility.

Kay nagadinamo na ang kaso sang Covid-19 sa bug-os nga Pilipinas ilabi na gid sa Manila, gindesisyunan naman sang NIATF nga papaulion ang mga Locally Stranded Individuals (LSI) sa ila tagsa ka probinsya agud indi na didto magginutok pa.

Diri na dayon nagdinaguso pauli ang mga LSI kag mga Overseas Filipino Workers (OFW) halin sa mga nagakalainlain nga lugar, kag diri dayon nagdinamo ang kaso sang Covid-19 sa aton probinsya.

Tungod sa kadamuon sang nagapalauli diri, nagaproblema na sa karon ang mga mayor kag mga barangay kapitan tungod ang iban puno na ang ila pasilidad.

Nabudlayan pa gid sila tungod sining mga asymptomatic nga ginatawag nila—inang wala sang simtomas sang virus pero pag swab Test sa ila positive sila. Diri naman nag-meeting ang mga mayor kay Governor Contreras nga kon pwede may ara gid quarantine facility ang probinsya para lang sa mga asymptomatic nga mga positive agud indi sila pag impunon didto sa mga symptomatic.

Subong ginaplanuhan naman nga obrahon quarantine facility ang Sancta Maria et Regina Seminary sa Brgy. Cagay. Ambot kon mapasugot naman ayhan ang siyudad sini?

Anyway, plano pa man lang ini sang provincial government kag mga mayor sang 16-ka municipality. Basi indi man madayon pareho sato anay sa CNHS.

Suno gani kay Mayor Labao nga sang nag-meeting kuno sila nagrekomendar si Mayor Nonong Palomar sa mga mayor dala pati mga barangay kapitan nga mag-amutay na lang agud magbakal sang swab testing machine para may ari kita diri sa Capiz kag madali ang resulta. Indi na pagdal-on pa sa Iloilo kay madugay pa.

Apang suno kay Labao nga naghambal man kuno si Mayor Dadivas nga may maabot siya kag willing man siya mag-akomodar sang mapa-test halin sa mga bug-os nga probinsya basta may bayad lang.

Dason naghambal man kuno si Governor Contreras nga may ara man siya manug-abot na. Iya ina sang probinsya kag libre na kon magpa-test ka.

Pero hasta kuno sa karon, daw wala pa man kaabot bisan isa? Hulaton na lang kuno nila kon san-o man maabot! Basta may maabot!