Bilang isa ka pumuluyo sa siyudad sang Roxas, batyag mo bala nga safe ka samtang nagapanglakaton sa dalanon sa gab-i? Ukon samtang naga agi ka sa makitid nga mga alagyan? Sa pihak sang kauswagan sang syudad, may yara gihapon sang pamatyagan nga kakulba kag kahadlok samtang nagalakat sa pila ka bahin sang syudad.
Damo sang nagasiling nga indi mapunggan ang krimen sa pila ka lugar sa Roxas. May mga area nga bantog nga ginapuy-an sang mga drug addict, kag may mga istorya sang pang-abuso, pagpangawat, kag maski pagpangpatay. Indi naton malikawan nga ma-alarma. Ang masubo, daw nangin normal na lang sa iban ang pagtan-aw sini nga mga sitwasyon, nga kon mahimo dapat atubangon kag solusyunan.
Pero indi lang ni nagatuhaw sa dalanon. Bisan sa aton public transport, labi na sa tricycle, may yara man sang mga nagasiling nga indi sila komportable. Kadamo na sang kabataan nga nagareklamo bahin sa indi maayo nga pamatasan sang pila ka drivers. Makahadlok mabatian nga may mga estudyante nga daw ginahimuslan ang ila kahuyang.
Diri nagapamangkot kita: Ano na lang ang madumduman sang kabataan kon kada adlaw nagakahadlok sila? Paano sila mangin produktibo kon pirmi may kahadlok kag indi pagsalig sa komunidad nga dapat magprotektar sa ila?
Bilang pumuluyo, indi kita dapat magpabilin nga tahum lang ang Roxas sa atubangan kag delikado sa likod. Ang seguridad indi lang obra sang kapulisan ukon sang city government, kundi responsibilidad man sang tagsa-tagsa. Kinahanglan may ara sang istrikto nga pagpatuman, mas aktibo nga pag-respond sa reklamo sang tawo, kag labi na gid ang paghatag sang hustisya kon may sala nga natabu.
Roxas City, ginakilala nga Seafood Capital of the Philippines, matahum nga pangalan nga ginabisita sang iban nga lugar. Pero dapat man naton ipakita nga safe kag masaligan ang aton syudad. Kay sa ulihi, ano gid ang pulos sang kauswagan kon indi makalakat sang matawhay ang tagsa nga pumuluyo sa dalanon sang iya syudad?
