Sin-o dapat ang maghusga?

MANGAPE TA!

Madamo na nga mga pagsinapol ang ginpatigayon nahanungod sining ginahinyo ni Capiz Governor Nonoy Contreras sa mga katapo sang Sangguniang Panlalawigan nga nagabalor sang P79,106,780 agud gamiton para sa ikaayo sang mga nagkalain-lain nga sebisyo kag pasilidad sa mga departamento sang Provincial Government.

Ang pundo pagakuhaon sa mga masunod: 2019 surplus nga nagabalor sang P21,820,534; 2021 Covid Response Fund nga P40,000,000; 2021 savings on procurement of goods and services – P8,235,293; 2021 gender and development fund – P2,756,362.00 kag PS savings halin January asta February nga P6,204,590.

Kag ini nga kwarta pagagamiton  sa mga masunod: Roxas Memorial Provincial Hospital (RMPH), Bailan District Hospital, Mambusao District Hospital, Provincial Health Office, PGO-Equipment Pool Division, PEO- Administrative Division kag Capiz Rehabilitation Center.

Suno sa mga Board Member Jonathan “Sonny” Besa, ang chairman sang Committee on Appropriation nga gin approban na nila halos ang tanan nga naginarequest sang supplemental appropriation tungod kompleto ang ila sini nga papeles maluwas lang sa RMPH.

Agud ma-liquidate ang ginapangayo sang RMPH nga nagabalor sang P47.5 million, ginapangayuan nila ini sang mga supporting documents pareho sang Purchase request, purchase order, delivery invoice receipt kag requisition slip kada transaksyon  kag listahan sang mga swelduhan nga empleyado pareho sang job order, contract service kag regular staff pati ang ila contact number agud mabal-an gid kon matu-od sila nga empleyado.

Tungod wala sa gihapon maaprobahan sang mga board members ang supplemental budget sang RMPH umpisa sang paghinyo sini ni Governor Contreras sang August 3 hasta subong, nagakahangawa nagid ang pamunu-an sang RMPH nga si Dr. Edmarie Tormon tungod kahabin kuno sina nga budget pagagamiton sa sweldo sang nurses and doctors nila.

Gani sang September 13, nagpagwa ang RMPH sang ila statement nga ang hospital kuno puno na kag wala na sila sang may mahimo pa kundi mag timeout. Bu-ot silingon indi anay sila magbaton sang mga pasyente lang anay sa sulod ang ila nga tutukan.

Bangud sini nga statement sang RMPH natandog ang taguipusu-on sang mga mayor sa mga kabanwahanan kag sang September 21 nagpatawag naman sang pagsinapol ang League of the Municipalities of the Philippines-Capiz chapter sa pagpanguna ni Mambusao Leodegario Labao Jr. kaupod sini amo sanday Mayor Arthur John Binas, Sapian; Felipe Neri Yap, Ivisan; Raymund Malapajao, Maayon; Receliste Escolin, President Roxas; Tito Mayo, Cuartero kag Roberto Palomar sang Tapaz.

Nagpadala man sang ila tagsa ka representante ang iban pa nga mga mayors lakip na ang Roxas City.

Nagtambong man didto sa LMP meeting amo sanday Dr. Edmarie Tormon, RMPH Chief, Provincial Administrator Edwin Chinel Monares kag Provincial Legal Consultant Atty. Augusto Marcelo Cosgayon.

Suno gani kay Mayor Palomar nga may mga nagatawag sa iya nga indi pagbatunon sa RMPH, muna nga gusto na nila nga matapos na ina nga issue kay pumuluyo ang nag-antos.

Pamangkot pagid sang mga mayor didto ngaman indi nalang pag-ihatag sang RMPH ang ginapangayo sang mga board members?

Apang ginpanindugan naman didto ni Atty. Cosgayon nga nagasunod gid lamang sila sang ginatawag nga Data Privacy Act.

Sa press conference naman nga ginpatigayon sang Sanggunian Panglalawigan, sabat naman ni BM Thea Faith Reyes kag BM Atty. Matt Hachuela nga indi applicable ang Data Privacy Act sa mga empleyado sang gobyerno kay taxpayers money ang ginasweldo sa ila.

Sang September 22, nagpatiagayon naman ang mga frontliners sang RMPH sang candlelight protest para hinyu-on sa Committee on Appropriation nga aprobahan na ang ila ginahinyo nga supplemental budget, agud may i-sweldo sa ila

Apang matigdas ang panindugan ni BM Besa nga |”non-compliance, no supplemental.”

Karon ang pamangkot ni BM Besa, ngaman nakasubmit gani ang iban nga mga hospital sang ila ginahinyo nga mga papeles? Ngaman ang RMPH indi? Kag suno pa kay Besa nga kon sweldo ang kinahanglan sang mga frontliners, bastante pa ang ila kwarta hasta October 15.

Sa diin gid bala ang problema diri? Kon imo sila pamatian, tagsa-tagsa sa ila may rason man. Sa karon aton makita nga ang profile picture sa Facebook Page sang Roxas Memorial Provincial Hospital madulom kag may hashtag nga SaveRMPH.

Ang pamangkot, sin-o bala dapat ang mag save sang RMPH? Kamo bala dira mismo sa sulod sang hospital ukon SP? Ukon kinahanglan na bala patung-an sang gobernador?

Suno sa ila wala man kuno sila gapamulitika, hay gaano sila? Ga-drama? Daw teleserye lang kag sa kadamo na nga mga meeting nila nga ginpatigayon, wala gihapon matapos ila problema.*