Weather-weather lang!

Sang February 6 nakibot ang tagdumalahan sang Baskog Radyo tungod may mag tawo bitbit ang Memorandum Order No. 36, Series of 2021 nga pirmado sa Provincial Administrator Edwin Chinel Monares nga nagasugo nga bungkagon ang antenna sang radyo station nga nahamtang sa rooftop sang Capiz Government and Business Center.

Suno didto sa memorandum order nga may petsa February 5 nga ang antenna sang nahinambitan nga radyo station nagahatag sang peligro sa mga pumuluyo kag ginpamatud-an man sang Provincial Engineer’s Office.

Suno pagid didto sa memorandum order nga ikapila na kuno ka-beses ginpatawag sang provincial government ang tagdumalahan sang Baskog Radyo agud ikalro ang isyu nahanungod sang ila pagpatindog sang antenna apang wala kuno may naga-kadto.

Pagkatapos mga masirbe ang nahinambitan nga Memorandum Order sang February 6, nag-untat na sang pagwaragwag ang baskog radyo sa kahanginan apang sa gihapon padayon sila sang ila mga programa pinaagi sa ila Facebook page.

Suno naman sa pahayag sang station manager sang Baskog Radyo nga si Jay Lavapiez, nagkasugot kuno sila sang provincial government nga mabalik ang ila koryente sa ila studio kag indi pagkakason ang ila antenna kabaylo nga indi man sila magpalayag sa ila ila frequency nga 102.3.

Dugang nga pahayag sang tagdumalahan sang Baskog Radyo nga wala sila sang may nabaton nga court order halin sa korte kundi memorandum order gid lamang halin sa provincial government nag ginpirmahan ni Monares agud kakason ang antenna.

Ginpasalamatan man sang tagdumalahan sang Baskog Radyo ang mga nagasuporta sa ila kag ginklaro man nila nga ang natabo sa ila sa tunga sang provincial government isa ka pagpamigos sa hilway nga pagpahayag.

Kon aton matandaan ang Baskog Radyo nag umpisa ina sang tuig 2018 kon sa diin si anay Governor Antonio Del Rosario pa ang governor diri sa Capiz. Pila man katuig ang ila pagpahayag sa kahanginan kag indi lipod sa aton nga daw naunahan na nila ang iban nga mga radyo station diri. Kag pag abot sa bululigan Baskog Radyo sayon ang ginapalapitan.

Naobserbahan man naton nga sa ila mga programa, umpisa nagpungko si Governor Nonoy Contreras masami ini nga topiko kaupod ang provincial administaator sini nga si Edwin Chinel Monares.

Ano ayhan ang rason sa likod sini? Delikado gid ayhan sa nga pumuloyo ang antenna sang Baskog Radyo ukon tungod ginpatindog ini nga radyo station sa termino sang nagligad nga administrasyon?*